老師父母教我要做個乖孩子，但我從來不聽話，由細曳到大，仲唔明點解一定要坐定定先叫乖。終於俾我搵到同道中人。本地插畫家CarrieChau，自細就是大人眼中的曳孩子，最近還用了英文諺語中的「黑羊」（解作不良分子）來作為畫展主題，狂出產品，證明壞孩子今日受歡迎，Carrie畫公仔畫出腸：「曳？我認喎！人人白獨我黑，幾有性格。」
記者：葉雪芯
攝影：伍慶泉
「我是不良分子！」
黑羊（BlackSheep），在外國人眼中都是壞東西，諺語中解作不良分子，記者翻開字典就看到「敗類、害群之馬」。Carrie說，她畫畫的靈感多數是來自自己，年前創作的WuYingCollection，正正因為覺得自己似一隻盲頭烏蠅，喜歡飛去邊就去邊，亂咁撞。今次畫展主題，Carrie用黑羊來做主題，因為她覺得自己就係咁：「我啲朋友都好乖，好聽話，但我由細到大都唔係。幼稚園時用蠟筆幫全班同學化妝；又試過冒家長簽名，好反叛，又鍾意激阿媽，見家長多過食飯。就算大個咗都係咁，最曳係喺英國讀大學時，唔考試，走咗去旅行。後來激到阿媽喊，先知衰，識得驚。不過𠵱家都係不良分子，返工之後又好似玩咁，成日做嘢好遲，交唔到貨。」不過，她強調，黑羊是曳、調皮、不守規矩，但不是壞，不會殺人放火的。
「你都係黑羊！」
世界上，白羊永遠多過黑羊。Carrie認自己係黑羊，不過她就點醒大家咪以為自己是白羊：「其實人人都有黑羊一面，偶爾都會想突破一下框框，百厭一下。不過呢個世界就係有好多隨波逐流的人，人人讚白羊好，就跟足晒別人嗰一套咁做，無晒自己Character。
「其實黑羊都可以好可愛，甚至可以帶給世界一點火花。好似上年我去法國睇畫展，有個美國人將自己亂畫的一幅小畫貼了在另一幅名畫隔籬。我真係覺得好搞笑又好欣賞佢喎！如果大家所畫的都是藝術品，點解我幅畫唔可以貼出來俾大家欣賞呢？雖然其他人一定會覺得佢搗亂搞破壞，佢的確係曳，不過無傷大雅，仲可以帶到啓發俾人㖭。」
要黑羊特立獨行，又有點離經叛道，也許就是創作人的特質。在現實世界中，她最喜歡的黑羊人物是黃耀明：「初出道俾人笑《撻成一塊》，唱啲歌又唔係主流，形象又怪，不過佢無變過，一樣係照玩反叛，黑羊到爆，好有自己風格。」
「黑羊有人愛！」
說起來，黑羊好像身世很慘，得不到別人喜愛，又是壞分子，形象好負面。不過Carrie好幸運：「黑羊無咩唔好，所以我又唔介意俾人話我係。好彩係由細到大我都被人錫，老師覺得我壞，不過又幾鍾意我，激嬲媽咪，佢又會原諒我。我身邊有好多愛和包容。我想講的是，如果你是真心想追求夢想，即使你使出黑羊的一面，別人也會給你愛的。」
黑羊畫展
日期：9月2日至16日
時間：10am-10pm
地點：時代廣場二樓大堂
查詢：21188900
首次出畫冊
「黑羊畫展」是CarrieChau第二次的個人畫展，由設定主題到實行計劃用了一年時間。場地將佈置成羊棚，以黑羊為主題，亦是她最大型的一次展覽，共有100件作品，當中超過半百作品更是首次亮相，包括繪畫及高兩米半的巨型黑羊雕塑。另外，還會首次出畫冊《沒完沒了的遊戲》（《NonstopGame》）、限量版4吋高黑羊公仔Figure及其他精品推出，是她近年畫畫以外的一些新嘗試。
售賣點
1.銅鑼灣時代廣場展場（21188900）
2.Homeless（28721881）
地點：中環歌賦街31號地下