中國最高身價球星鄭智，前日（25日）首次為英冠球隊查爾頓上陣，即刻憑一個助攻協助球隊連追3球，最後以3:2反勝錫周三，取得今季首場勝仗，呢位「中國施丹」繼上季之後再度揚威歐洲！
外號「ZZ」嘅鄭智今夏以200萬鎊身價（3,140萬港元）轉會查爾頓，創下中國球員最高轉會費紀錄。球隊今季頭兩場聯賽1和1負；呢場對錫周三，查爾頓上半場先落後0:2，之後鄭智臨完上半場時入替受傷嘅戴卓爾，埋下成為反勝英雄的伏線。
後備上陣助球隊連追3球
下半場先追成1:2的查爾頓，到67分鐘，鄭智再交個靚傳送畀伊維路莫追成2:2，成隊士氣大振下，最終成功反勝3:2；而贏波之後，3戰得4分排英冠第12位。巧合地，佢上季英超首次為查爾頓上陣亦係後備上陣，睇嚟後備上陣都幾利佢。鄭智賽後就話自己冇波入唔緊要，球隊贏波先最重要。
求大俠留意中國波咁多年，最少批評嘅就係鄭智。點解？因為覺得佢夠農民囉！即係純樸、落力、謙虛，唔似其他外流歐洲嘅中國球員，去歐洲踢波（實質係坐冷板凳）好似好巴閉咁，返到國內就吹捧自己有幾犀利，兩個字：浮誇！
希望其他外流嘅中國球員，可以學習鄭智呢種能屈能伸嘅精神，搵機會去英冠、英甲球會落班，起碼多啲機會落場比賽，好過喺大球會坐冷板多多聲喇！