1.星期六9新特蘭vs利物浦
波膽：0:2
信心指數：★★★
利物浦雖然只係在聯賽亮相過兩次，但係經已俾人睇到佢哋爭聯賽冠軍的實力，上場對車路士就係最佳例子，尤其睇到費蘭度托利斯加盟之後，紅軍的攻力提升咗幾多。
另一樣畀到我信心既係，利物浦擁有龐大的陣容，聯賽鬥車路士同歐聯鬥圖盧茲幾乎排出兩個完全唔同的陣容，咁樣啲好處係咩呢？就係可以保持球員對比賽的新鮮感，需知道英超的比賽節奏及球員所需要付出的體力，係歐聯賽事的兩倍。
高治餓波必博
至於「黑貓」新特蘭方面，我仲未睇得到堅尼買番來的新球員有幾實用，第一場贏熱刺只係因為對手踢得差，之後對住伯明翰兩度落後下追和，跟住仲輸埋畀韋根，實力去到邊可想而知。
而紅軍有謝拉特在周中英格蘭友賽掛免戰牌（編者按：謝拉特今場料缺陣），加歷查堅決唔肯返國家隊，有更充裕的時間唞足精神，對利物浦後防絕對係百利而無一害。前線除咗有費蘭度托利斯之外，仲有禾路連同埋周中幫荷蘭入波的古積特，唔好忘記高治呢位利物浦上季首席射手今季仲未落過場，肯定餓波，前線攻力強勁又夠多元化，我完全睇唔到新特蘭有搶分的機會，始終英超同英冠的水準，仲係存在一大段距離。
其實季前都有擔心過利物浦今季加入多名新球員後，球隊能否短時間內磨合同建立默契，而過去兩場英超同歐聯外圍賽對圖盧茲所見，球隊基本踢法同上季沒有太大改變；同樣是先強調防守，加上前線有不俗的入球能力，球隊定把握今季開季比較順利爭取成績，以求向聯賽錦標進軍。
2.星期六17阿仙奴vs曼城
波膽：1:0
信心指數：★
曼城雖然開季連贏3場，但係講到作客阿仙奴往績，認真麻麻，足足有32年未贏過。曼城的米卡李察士表現越見成熟，相信可以為阿仙奴帶來麻煩。至於兵工廠方面，除尹佩斯之外，好似無乜人識入波，基拔圖施華一日未復出，都係少掂為妙。
3.星期六18阿士東維拉vs富咸
波膽：3:1
信心指數：★
雖然兩隊最近5次交手都係和波收場，不過今次我就睇好主場嘅維拉可以贏波。我絕對信任艾邦拉荷、勞基摩亞同艾舒利楊格有能力撕破富咸嘅防線。再講，富咸今場前邊無隊長麥比廸，又無咗保亞沙呢隻快翼，好難打破球隊34年來在維拉公園的不勝魔咒。
4.星期六19保頓vs雷丁
波膽：0:1
信心指數：★★★
輸晒3場的保頓一共失咗8球波，只係入得兩球，完全唔掂！至於雷丁，我一直都好欣賞呢隊波，先係同曼聯打和，對住車路士若果唔係遇到「黑色5分鐘」連失兩球，根本唔駛輸，而佢哋贏愛華頓開齋場波，就睇到乜嘢叫實而不華的球隊。
5.星期六20車路士vs樸茨茅夫
波膽：2:1
信心指數：★
從車路士在聯賽主場64場不敗，加上車仔有超過半個世紀，未試過在主場輸畀樸茨茅夫，經已說明一切。唯一要留意嘅係，車仔今季頭3場聯賽每場都有失波，加上佢哋大部份球員在剛剛周中國際賽上陣，唔多唔少有影響，所以絕對有贏波輸盤的機會。
6.星期六21打比郡vs伯明翰
波膽：0:0
信心指數：★★
伯明翰上季在英冠聯主客兩循環都贏打比郡，今季亦都增加咗實力，不過兩隊始終有「海鮮波」的味道，所以大家都靠唔住，都係和波格局具多。兩隊波的球員當中，只係得伯明翰的卡普踢得比較搶鏡，將會係勝負的關鍵人物。
7.星期六22韋斯咸vs韋根
波膽：1:2
信心指數：★
韋根上星期歷來首次做過英超阿一，士氣一流。希斯基同拍檔史施比斯基狀態「弗」到漏，其中施比斯基更加連續3場有波入，絕對有力在韋斯咸身上全取3分；而韋斯咸方面，個人就對保耶、戴亞同比拿美3位前紐卡素球員可唔可以擦出火花有保留。
8.星期六53愛華頓vs布力般流浪
波膽：0:2
信心指數：★★
布力般係我今個星期的「黑馬之選」。雖然後防有隊長賴恩尼爾遜坐波監，但係我仍然睇好佢哋可以作客搞掂愛華頓。就算「拖肥糖」有主場之利，但係實在難敵傷兵帶來的影響，安祖莊臣、占士禾漢、安尼捷比同卡希爾通通受傷，邊有得揮！
9.星期日9米杜士堡vs紐卡素
波膽：1:2
信心指數：★★
米杜士堡過去8次同紐卡素碰頭只係贏過一次。上場佢哋贏到富咸都係靠運氣，多得旁證睇漏眼，唔計富咸在尾段的入波。雖然新加盟的美度交到貨，但係幫助不大。至於維杜卡加盟後首次返回河畔球場比賽，肯定踢得份外肉緊，一於支持大Sam。
10.星期日21曼聯vs熱刺
波膽：1:1
信心指數：★★
曼聯遭遇15年來最差的開季，整支球隊陷入信心危機。頭3場比賽紅魔鬼一共有35次角球，27次射門中龍，30次射唔中門框，只係攞到一個入球，無人識入波！雖然我唔係咁欣賞熱刺，不過面對住一支自信心盡失的球隊，無理由同錢過唔去。
註：以5★為最高
「暢譚英超」周末推介（8月份）
重心主客和2x1：
星期六9利物浦勝（1.6）x星期六19雷丁勝（2.8）@500
主客和3x4：
星期六9利物浦勝（1.6）x
星期六19雷丁勝（2.8）x
星期六53布力般流浪勝（3.2）@100
波膽2x1：
星期六9利物浦勝2:0（6.5）、勝2:1（7.5）x星期日9紐卡素勝2:1（8.5）、勝3:1（24）@100
全日投注：1,300分
上次賺蝕：-500分
累計結餘：96,391分
規則：全季底分為100,000分，每次最多投注2,000分，以周二及周六見報貼士計。
譚拔士
5屆香港神射手，在效力南華及東方合共射入超過200球，被譽為歷來最佳外援中鋒；現於英國skybet任公關主任及足球博彩節目主持。
電郵：[email protected]