大同機械（118）由6月尾高位1.78元，插到再對上星期五，跌幅超過50%，但基本面冇問題，溫馨小注。大同主打注塑機業務，06年度（12月底止），19億銀嘅收入當中，佔咗17億銀係嚟自中港兩地（中國收入10億銀），歐美市場收入比重只得6%。大同主要收益嚟自祖國，玩內需，已經好穩陣。只係好保守計數，大同07年度純利增幅，同06年度同，去到兩成水位，純利7800萬銀，PE落番10倍。
又大同揸住嘅聯營公司深圳浩寧達儀表（42%），表明有計劃喺A股上市，兼且已經進行緊上市輔導，掹車邊，大同都有炒分拆A股概念。再講，A股升到飛起，聯營只要成功上市，大同嘅家底又水漲船高。呢轉入市，博大同07年度PE上番12倍，大同價見1.33元，潛在升幅接近20%。
丹楓亁淨到爆
丹楓（271）最新NAV1.65元，連埋手頭物業重估，NAV可以上到兩蚊，現價（0.8元）折讓達到60%，已經有NAV墊底。又丹楓經過對上幾年撥備，已經亁淨到爆，加埋中國對外貿易運輸集團又係股東之一，股東背景咁勁，對丹楓係咪有新機遇，會有憧憬。丹楓經過呢期急插，跌到250日線同成交密集區，已有支持，先嚟轉短打，博丹楓彈番上50日線，價見1蚊，潛在升幅25%，亦係有魚有肉。
錢雋