昨日港股好淡大鬥法，各贏半場，朝早淡友佔上風，晏晝好友逐步收復失地，雖然都係要跌，但跌少咗好多。不過，成交得832億，睇外圍嘅情況，個市仲會好波動，如果昨晚花旗股市升跌幅度大啲，下禮拜一港股又會再刮風暴。
前晚歐洲央行又向銀行射水，放出400億歐元，3個月期，咁大銀碼，個期仲咁長，大家都知發生乜嘢事，花旗嗰邊都唔好得好多，聯儲局減貼現率都冇用，要繼續向市場開大水喉射水，大家有睇報紙都知道，花旗好多大行都積極裁員同關閉一啲同次按業務相關嘅分行，𠵱家被裁嘅人雖然話只有兩三萬，但好多都係高薪厚職，對消費市道自然有影響，而且事情仲發展緊，受牽連嘅人一定更多，花旗未來嘅經濟點睇都唔會好，𠵱家仲有好多人用舊嘅盈利嚟估值，堅持唔用預測盈利，諗極都唔明。
昨日尾段個市掃番高，有炒家追貨，不過成交唔大，正常嘅，呢啲市況梗要小心，追貨大多都係對準啲中資股，保險股最受歡迎，其他強勢股都有好多人入貨，國內股市仲日日新高，加埋「炒股自由行」，揀啱股可以搵番餐晏仔。
中交C輪2479：中交建（1800）昨收16.12元，股價喺10日線同20日線磨咗幾日都冇乜動靜，不過技術走勢已好番啲，如果個市唔出現急跌，中交建有機會試吓17.40元，可以買啲中交C輪2479短炒，昨收25仙，槓桿率6.5（有效4.5倍），正股升上17.40元，2479應該喺34仙樓上，正股跌穿15.30元止蝕。