八月十四日本報談及「會考狀元口氣大」，引起回應。有讀者同意，認為狀元考生自己咁叻，都要顧吓別人感受，畢竟有好多考生考英文只得一級，算係肥佬，會考狀元眼中嘅中二中三英文程度試卷，點解咁多中五考生答唔掂呢？係傳統英文名校學生啲英文太醒，還是好多中中學生嘅英文太水皮？答案可能係中間落墨，兩樣都有啲。
有讀者來函罵左丁山一頓。一位Jackie來電郵話自己係中六升中七學生，出身鄉村小學，中學讀一間名校，英文成績中下，去年會考嘅英文成績不理想，特登今年重考英文科，馬馬虎虎準備之下，也考到5級，比舊年好好多。Jackie話：「請問你做過今年的會考英文卷嗎？你憑甚麼斷定今年的會考英文卷並不是只有中二三程度？你知道今年會考英文科的閱讀卷有多簡單？簡單到一個比較出眾的中二學生也可以做得到！」
真係？有位升中二嘅學生叫做細路豪，讀英文中學中二精英班。左丁山叫佢用考試局出版嘅示例，照題目寫篇作文，根據考試局嘅sample評分，左丁山畀細路豪一至二級之間。後來再周圍問今年會考英文試卷嘅閱讀卷有幾咁「簡單」（如Jackie所言），得到嘅答案係，英文卷PaperA係閱讀卷（ReadingPassages），內裏有三篇，一篇關於「廣告」，一篇關於「美麗」，一篇關於KarlLagerfeld（著名時裝設計師）；廣告篇最淺白，美麗篇唔簡單，Lagerfeld篇甚為複雜，並非中二中三學生可以完全明白嘅，十七歲學生考到5*，絕不簡單，但如果自己考到5*而話英文卷程度低至中二三，絕非公允，而係口氣大。更何況，要作文呢！中二三學生考今年中五會考英文卷而得到5*，肯定係自細喺屋企與父母用英文溝通嘅中產或富裕子弟，屋邨學生一定唔得。自己叻，唔須要暗示別人水皮，踩低香港中五會考水平啫。左丁山歡迎考英文5級嘅中七生Jackie寫篇三百字英文電郵嚟睇吓水平如何，如有5*級嘅，亦請來英文電郵一篇，等左丁山比較吓，或者代送畀陶傑贈送評語幾句。