天使與魔鬼之戰一直鬥個唔停，由天上鬥到落地，為收服對方，連四個轆都唔放過，擇日而戰！天使AngelYu搵咗第九代「露筍」出戰，冷艷魔女Hidy就搵嚟辣房ColtTurbo迎戰；論性能，改裝版Colt未必夠「露筍」砌，不過魔女識得揀唔多直路兼超多彎嘅山路嚟鬥，擺明發揮細車好彎特性，加埋奸險毒招，鹿死誰手真係要鬥過先知！
記者：梁美甜
攝影：譚盈傑
演出：Yu、Hidy（PureModel）
勝負究竟係屬於天生為賽車而誕生嘅「露筍」抑或係專業改裝小辣房呢？
一起步，大天使就憑「露筍」嘅280匹超強馬力搶先彈出。
魔女利用ColtTurbo六前速+/-波配CVT無段變速，不但初段未被拋離，原來想耍詭計：「開高燈燦死你！」
魔女乘時發力加速，ColtTurbo用咗Yokohama16"AD07跑車胎，咬地性超強，天雨路滑都夠穩定。爬完頭，魔女仲玩埋濃霧魔法，令對手難以力追。
魔女意猶未盡，踩埋Brake急煞，茅招盡出。好在「露筍」懸掛搖臂加裝咗兩條防滾桿，增加高速轉彎穩定性，一扭軚就避過呢劫！
超越ColtTurbo後，大天使猛踩油門，轉數直飆4,000爆埋Turbo，強大力量輸出配跑車化懸掛，高速拗彎一樣掂，魔女開始食塵。
魔女急起直追，Colt改配MIVECTurbo引擎後果然有料到，加上車身輕、起步有力，已漸逼近「露筍」。
ColtTurbo加裝Intercooler嘅1.5公升Turbo引擎，低轉就有強勁輸出；「露筍」稍收油過彎又被ColtTurbo推尾而至。
形勢危急，大天使踩盡油門，發揮「露筍」280匹威力，望喺直路拉遠魔女距離。
直至最後一個S彎仍難分難解，大天使憑住四驅劈彎咬地性，一口氣再拉遠雙方距離。
AngelYu印印腳喺終點等魔女，勝利笑聲充斥山頭，魔女落敗黯然離去：「我哋仲未鬥完……」
結局
勝利滋味都仲未落格，大天使一上車，赫然喺倒後鏡見到魔女！
戰鬥格：戰鬥格「露筍」落場版
港人俗稱「露筍」嘅Evolution，一向都俾人兇狠辛辣嘅感覺，事關佢係為拉力賽而誕生嘅車種（RallyCar），擁有精巧嘅外形、驚人引擎動力同埋千變萬化嘅路面懸掛系統等特色。香港曾一度斷貨，直至近年才再度引入，而新一代「露筍」就係今日大鬥法嘅第九代落場版，跟一般出口版最大分別係專為比賽而生產，所以全車無多餘裝飾，輕量化嘅車身令佢更砌得。較為特別係呢架落場版反而無咗原裝Recaro桶椅，莫非係叫車手自己更換適合自己身形同喜好嘅款式？
規格表
引擎：1,997c.c.直4DOHC
馬力：280ps/6,500rpm
扭力：36.2kgm/3,500rpm
傳動：五前速手動波箱
驅動：前置引擎、四輪驅動
查詢：環宇汽車（25200636）
超級辣：超辣細車起步加速快過人
提起Colt，大家可能諗到斯文老積小房車，不過RALLIART版加Turbo就完全兩回事。如果你對三菱有一定認識，實知RALLIART就係三菱官方改裝部門，專為自家汽車改裝調校去跑拉力賽，所以由佢哋改裝兼加有Turbo嘅Colt雖只得1,500c.c.，但馬力輸出可去到154匹，無論起步同加速表現均非常優秀。輕量化車身裝晒包圍，頭冚仲有Turbo入風口，一睇就知係戰鬥格。內櫳前座全桶椅以紅色為主調，明確Show俾大家睇佢係辣嘢，咪見細車就恰。
規格表
引擎：1,468c.c.六前速自動波配MIVECTurbo
馬力：154ps/6,000rpm
扭力：18.3kgm/2,500rpm
傳動：六前速手自排+/-波箱配CVT無段變速 驅動：前置引擎、前輪驅動
查詢：環宇汽車（25200636）