好耐都冇大盤推，啱啱開賣嘅天水圍栢慧豪園，入場費低，啱上車客。消息話好多炒家入市，仲有內地客掃，真定假就唔知，但百零萬嘅新盤確實唔多，有都喺新界，市區冇二百萬都唔使諗。栢慧豪園發展商喺紅磡海逸豪園漁人碼頭商場，搭咗個售樓處，仲有六百幾呎示範單位，不妨過去行吓。
不過，呢一頭紅磡係住宅區，附近以工廠為主，睇完示範單位，想去附近行吓，除咗可以行幾步落黃埔商場，仲可以搭車去鑽石山荷里活廣場，商場𠵱家搞緊個高達模型展，展出全港最大型高達模型，展品大大話話有500個，高達迷點可以錯過！
對高達冇興趣，可以搭船過海，去西環西寶城商場，場內播放一系列「我們這一家」動畫，最啱一家人去睇。
