美國矽谷係全球著名高科技中心，嗰度有好多百萬富豪，咪以為佢哋身光頸靚，餐餐魚翅撈飯，其實多數人都好慳，為咗維持財富搏命做嘢，所以被稱為「寒酸富翁」或者「工人階級富翁」。有網友喺《MSN討論區》問：「做百萬富翁係咪一定要咁慳？」
BigJohn話：「做百萬富翁其實有好多方法，例如做『層壓式傳銷』，或者喺互聯網做生意（向批發商買貨，然後喺eBay網站轉售）；甚至利用次級按揭買樓，因為唔使畀首期。不過，做富翁嘅基本功係努力工作、儲蓄同投資。已故美國石油大亨保羅．格蒂話過：『想發達就要早啲起身、晏啲收工，日日畀心機搵錢』。」
有個好急功近利嘅網友問：「點樣可以喺21歲就做到百萬富翁？」
揀個有錢老竇
TimMiddleton-MSN講笑話：「只有一個方法，就係識得投胎，搵個有錢老竇，例如美國地產大亨特朗普（DonaldTrump）就含住金匙羮出世。」