最近星俠睇過坊間個別股評，有一篇論及香港散戶「善忘」，好快就「唔記得次按危機」，見到個市受惠內地放寬「炒股自由行」，又瘋狂衝入股海炒過。文章大意如此，似乎對香港散戶的善忘略帶貶意。
星俠不知該文作者究竟有幾深炒股經驗，亦無意去深究。「善忘」有時係一件好事，尤其是過去的不快事，終日記在心上對自己並無好處；人生得意須盡歡，有花堪折直須折。坊間股評質素參差，星俠認為，散戶學曉忘記某些「無料到」的股評，肯定無錯。
洽購兩至三家醫院
星俠曾在年初強調，今年股壇炒作主題應不離農業、醫藥及節能3項，實情如何，諸君自有結論。曾在3月底推介華夏醫療（8143），股價升至0.65元後，踏入5月走勢即一直跑輸大市；該股繼年初入主重慶愛德華醫院後，新近又宣佈以總代價8085萬元收購第二個項目浙江嘉興曙光醫院55%股權，有重新留意價值。
曙光醫院佔地9271平方米，擁100張病床，係嘉興市唯一獲認可的二級綜合私營醫院。收購協議中集團獲保證，曙光於07年收支平衡，08年純利不少於825萬元。
除收購愛德華醫院及曙光醫院外，未來華夏計劃在今財政年度再收購多兩至三家醫院，盈利基礎有望增強，可趁股價跌至0.30元水平吸納，料中線可重回高位0.65元。