可能首代鬼王雷宇揚忙住拍《陰陽路》第一千零七十集，可能龍婆同教宗握完手後法力全失；講起農曆七月十四鬼節，我淨係諗起有線《怪談》做到有FansClub嘅梁思浩。
訪問前，公關小姐同我講話思浩有幾架車唔知佢揸邊架嚟，聽到呢度，有腳踭有下巴嘅我，暗自斷定佢係車迷。點知嗰晚入到元朗荒蕪之地搵思浩，夜麻麻靜英英，喺昏暗淡黃嘅街燈映照下，見到有個黑影挨住架平治C200陰滋滋同我講：「查實清水灣道最猛，仲有，我……其……實……唔鍾意車㗎……」
嘩？咁邪？
文：嘴嚼爺
攝影：陳陶鈞
黑色車非不祥
揸車人士或多或少都會諗過，假使喺深宵時分揸車，遇到長髮飄飄白袍物體伸手截車，到底停唔停好？以為做慣靈異節目嘅思浩，會大講燒符、桃木劍之類嘅應付方法，點知佢好理性咁話：「我唔會不顧而去，但只會拉低三分一車門玻璃睇吓發生乜事。因為幫人都要保障自己，Lock好門拉低少少玻璃，有咩事佢唔可以成個身挨入嚟。」
原來唔當佢係鬼，「我信有鬼嘅，但嗰啲咩色車襯咩人、咩車容易撞到靈體我就唔信，啲人話發生意外多數係黑色車，其實可能係夜晚黑色車令人不為意啫，咁解釋會科學啲。我就鍾意深色或銀色，冇得解。」
不愛揸車愛儲車
鍾意跑車、四驅定房車？啱啱拍完兩組有線劇《補習天后》蛇出嚟做訪問嘅思浩話：「我真係冇所謂。」聽講你有幾架車喎？「哈哈，都唔算好多啫。其實我唔太鍾意車，亦唔鍾意遊車河，有時返工都坐保母車，係《蘋果》話影相我先揸咋。」無三不成幾，仲要全屬同一德國名牌，錢真係咁易搵？「我幫襯呢個牌子20年喇，A級、C級都買過，覺得佢最安全可靠同售後服務好。車我只係用嚟代步，安全可靠同襟用最緊要。」
新牌揸Civic
中學時代睇《城市故事》，嗰陣梁思浩得17歲，成年即去考牌：「新牌買車有咁平得咁平，我嗰陣架Civic前後左右唔係揩花就凹咗，揸咗3個月先換架二手平治E190，之後就冇轉過其他牌子嘅車。」
幾架平治揀嚟揸，方便襯衫？「揸嗰日人多咪用大車，人少就細車。最常用係呢架C200，方便同埋細架！我從來冇追求過速度，淨係諗萬一遇到意外，保住自己條命最緊要。6、7年前有架C240，陪咗我好長歲月，仲有一陣熟悉嘅味道，到最後揸去俾人劏我都好唔捨得，心情好差，我仲記得車牌係9818。」
清水灣道多怪事
間間學校都係亂葬崗，等於同親車有關嘅鬼古都喺屯門公路發生。但係思浩話屯公非最猛：「由壁屋至飛鵝山嗰段清水灣道，我聽過太多朋友喺呢段路遇到怪事喇。可能冇乜人知，原來飛鵝山尾有個義莊，係全香港第二最有歷史嘅義莊……」
鬼古
陸續嚟
有線冇英超但有思浩嘅《怪談》，所以我唔Cut住。追求刺激又冇裝有線，不如追《蘋果》車版一連6日嘅揸車恐怖經歷，仲有師傅教路避開靈界朋友！
1.阿婆跟足三個月
當年有個同事拍緊套醫生戲，佢做醫生做到出晒名，晚晚3、4點先放工，有晚去到壁屋附近，不經意望一望倒後鏡，竟見到個阿婆喺後座！佢話嗰刻淨係不斷諗：「跟住會點？跟住會點呀？」點知去到飛鵝山就唔見咗。嗰套劇拍足三個月，個阿婆就坐足三個月！
2.扭軚避鬼撞到人
又係壁屋嗰頭，有個男同事凌晨3點幾收工，轉上超市嗰邊突然見到有阿伯過馬路，當下扭軚避開，點知另一邊又有人，最後撞死咗佢㖭，回頭望唔見咗阿伯，當時報紙都有賣。最後佢去返嗰度打咗兩堂齋俾死者同「阿伯」。
3.最後，親身車鬼經歷
有次喺大角嘴港灣豪庭附近，載完朋友返屋企，突然好強烈感覺有「人」上咗車，猶豫咗好耐望唔望倒後鏡，最後雖然望唔到有異狀，但就肯定有嘢坐咗喺後座。其實我最怕落旺角，嗰晚我就特登揸過去，兜番幾個圈先返屋企。
後話：思浩教路防異物
思浩話揸車開咗冷氣，突然間比平時凍，或者相反好似冇開冷氣咁，就有可能多咗「乘客」。佢仲話搵柏葉、碌柚葉、黃皮葉浸一浸水，再灑落架車度，可以喺7月防止不必要嘅交通意外。
是日乃農曆七月十四日，今晚揸車就算標汗都係咁話——唔開冷氣費事疑神疑鬼！