筆者於上周六「造假突破刻意洗倉」欄內講明，港股遲啲仲神經，果然一語中的。
其實有經驗的股民見到如斯走勢，必定意識到個市完全發癲，汝道「春江鴨」又怎會玩一日咁短癮？閣下見到上周初嗰幾日連續裂口高開的手法，可曾相識？如果不曉得在下何所指，請去問問國內炒A股的朋友，是否有股票試過連續幾日開出皆升停板，等你買唔到，直至心癢難熬誓要飛撲入市買到時便「中招」？所以話：買得到，也未必好者也！
港股已成為國際大賭場兼大戶撼大戶的殺戮戰場，這種天堂──地獄的「跳樓機」遊戲，已不是一般散戶可以承受的玩意。大家還是「蹺」埋手睇戲罷！
君不見本港兩大超級富豪也對個市睇法各異乎？「超人」寄語散戶投資者，不應該借錢買股票之餘，還提醒各位中港兩地股市已升至高位，無論長線或短炒都有危險。汝道是否睇淡？
「亞洲股神」則大鑼大鼓話自己個基金於上個禮拜五大量撈底入貨，並揚言年底恒指目標價為25000點以上，國企指數則可見15000之上。仲話國企目前股價較A股為低，散戶可以入市選擇買貨。不是睇好，是啥？
「超人」、「股神」看法都大相逕庭，作為散戶又該信邊個？如果兩者鬥法，你估會是鹿死誰手？然則，誰勝誰負，或者兩個都有機會贏，都不打緊，皆因大把錢者。不過可以告訴汝等，一、兩千點上落，簡直濕濕碎！