搞笑組合ILoveYouBoyz、袁彌明、蔣嘉旼同李綺雯，噚日到沙田出席《愚樂ILoveU．Summer》宣傳活動，佢哋齊齊以沙灘裝亮相。大會安排成班藝人猜拳比賽，輸家就要俾人拋落水，不過最後三位女藝人都難逃一劫。
少爺占同Donald拉袁彌明落水時，袁彌明即刻大叫：「我今日唔方便呀！」但係佢哋冇理袁彌明，照樣推佢落水。由於袁彌明日前染咗一頭紅髮，所以佢上水時啲染髮劑甩色，整到膊頭同件衫都係紅色水。事後記者笑袁彌明「見紅」，佢話：「今次仲要喺胳肋底見紅，我會叫Donald賠番件衫畀我。」
Donald中招
李綺雯踢Donald落水時，仲踢到佢下體，Donald即時大叫：「好痛呀，邊個踢我下面？我要搵個兇手。」事後李綺雯扮儍話：「我踢到佢大髀咋，係佢自己話俾人踢到下面。」而Donald仲喺側邊話：「冇錯，我的確係咁壯健。」
