LisaS.及容祖兒（Joey）前晚齊在上海為鞋履品牌Ecco行騷，LisaS.透露改了個中文名字叫「雷珊」，本來相士有另一建議叫「雷小竹」，但若選此名則可能要嫁四次。至於身高不及專業模特兒的Joey則自嘲置身眾人當中是「凹字配」，但轉頭其助手卻聲稱她有42吋長腿。
容祖兒及LisaS.等前晚往上海為鞋履品牌Ecco行騷，身為代言人的Joey為隆重其事，度身訂做一條粉紅色裙出現，並獲品牌送贈一對靚鞋。前晚Joey行騷時十分淡定，唯一美中不足只是身高不夠一班專業模特兒而已。
自嘲「凹字配」
Lisa透露剛改了個中文名字「雷珊」，她說：「相士話呢個名有雷有珊瑚，即係有power又女性化，同埋呢個名包含咗水、土同氣。」她續說：「本來相士仲有個提議叫『雷小竹』，佢話我啲手指長，好似竹，但係如果改呢個名就要嫁四次。」問她有否叫相士將她中文名字與男友吳彥祖的名字夾一夾？她說：「相士話我哋呢兩個名唔係最完美，但係都算goodmatch。」
Joey接受訪問時表示，因為早前在美國學跳舞時，舞蹈老師有教她行catwalk的竅門，而她在後台也再次請教LisaS.，因而表現出水準，不過對於自己身高不及一班模特兒，Joey也自嘲置身眾人當中變成「凹字配」。
唔怕祖兒爭仔
雖然身高失色，不過Joey對自己的小腿仍十分滿意，只是希望大腿再瘦一點。問她腿長多少？她卻反問助手，助手即聲稱其腿長有42吋。Joey又表示選男友一定要比她高，不過當記者問她若男友矮過她，但像吳彥祖般靚仔會否接受時，她即說：「咁就可以諗吓。」LisaS.得悉男友搶手後即笑說：「我唔怕佢，我識功夫！」
採訪、攝影：曾小嘉
