科技K創辦公司，搞傳訊科技，轉眼二十年，今年又係公司上市十五周年，子公司上市十周年，意義甚大，故此科技K要盛大慶祝。佢創辦公司之年，正值大股災，咁蹺近月又有小股災，別人或會覺得大吉利是，科技K就最鍾意人哋睇淡嘅時候佢睇好，在一九八七年創業，已顯出佢嘅冇有怕風格。
人哋慶祝公司成立幾多周年，例牌菜係晚宴慶祝大會。科技K竟然別出心裁，主辦一個「祥和──中國西藏之光」（Peace＆Harmony,TheDivineSpectraofAvalokitesvarafromTibet,China）展覽，選在港交所交易大堂所在地、交易廣場舉行，由八月二十一日起至二十七日，早十晚八，請公眾參觀。交易廣場與國金大樓裏面，最多投行、經紀、法律界人士，相信為近日股市波動忙到心煩意亂，不論贏錢輸錢，都不知人生為何如此多災劫（譬如基金經理賣遊艇、大屋，直升機嚟冚數）。咁就最啱去睇吓何謂「祥和」，觀賞完啲觀世音菩薩尊像，包保心胸舒泰，心情祥和，看化大千世界之銀紙花花綠綠、股票之起起跌跌，無非過眼雲煙。
八月二十日黃昏，「祥和預展」由科技K主持揭幕儀式，左丁山得佢邀請，自然到場參觀。原來科技K篤信科技可以改善人生，信奉佛學導人向善，歷年不斷蒐集觀音尊像，今次展出一百零八件展品，包括不同顏色，面相、形態及物料嘅觀世音菩薩尊像，有齊紅、黃、藍、白、黑五種。展覽結束後，科技K會將所有珍貴展品捐贈予「中華世界文化遺產保護基金」，讓公眾以後有大把機會觀賞、了解眾生慈祥，慈悲無分國界、宗教、種族。
寶林寺退居老和尚釋聖一法師為展覽診藏集題辭云：「香江福報何其大，十台菩薩雲來集，三十六尊號圓通，七十二尊觀自在，一百零八觀世王，見聞瞻禮增福慧，萬人喜結萬善緣。」左丁山不懂佛學，參觀時幸好碰到退休歷史博物館館長丁，得佢幾句簡單介紹，獲益良多，館長丁話佢現在加入中大歷史系，專做研究喎。