入行5年的吳雨霏（Kary），沒有甜到漏的糖衣包裝，但勝在肯自強增值，繼隨容祖兒歌唱老師學唱歌，晚晚上床擘大口練呵氣後，新搞作是自資五位數字下月遠赴紐約隨師學舞。為填補荷包大出血，Kary表示已準備左慳右慳，到美後寄人籬下，迫巴士、坐地鐵，做個窮學生。
工欲善其事，必先利其器，吳雨霏深明此道理，所以年前已加入「Samson」一族，跟桃李滿門的人氣歌唱老師ChristineSamson（洛詩婷）學唱歌，跟容祖兒和鄭嘉穎等成為同門。為了練氣，Kary還聽足老師吩咐，每日攤在床上「柯」到冇氣，實在有趣。
搭地鐵坐巴士
Kary日前說：「呢個老師好好，佢教我哋好多唱歌嘅方法，佢教我練氣，要用丹田氣嚟唱歌，每日瞓喺床上係咁開聲『柯』，『柯』到冇氣為止，但真係有效，𠵱家真係好氣咗。」
除了「柯」不停練氣外，Kary也自強不息，自行上網學編曲，日前更落實自資五位數字到美國紐約兩星期，跟隨一名黑人舞蹈老師學跳舞，修讀舞蹈快餐速成班，Kary說：「我已經左慳右慳，點慳都要五位數㗎啦，去到美國會住喺朋友屋企，搭地鐵、坐巴士方便啲，美國啲嘢好貴，都唔會買嘢啦。我諗喺嗰邊嘅生活都好似學生咁，因為係報讀一間舞蹈學校嘅課程，一日要上足四堂。」
Kary表示很想進步，故選擇到美國學舞，她笑說：「我有好多嘢想學，今次學得個幾禮拜，老師話會難啲，未必跟得到，但我想專注啲，喺香港始終會容易分心，嗰邊啲老師好勁，跟佢哋係想打好跳舞基礎，學吓跳舞點轉圈，都係一啲比較基本嘅嘢。」
採訪：朱倬誼 攝影：陳偉權
服裝：SistyrMoon 化妝：Debroah
髮型：VincePangofILColpo
