【本報訊】肝膽相照不是鬚眉漢子專利，黃小姐、周女士、陳小姐，一群女子互不相識，與病榻上的昏迷媽媽李燕珊素未謀面，卻同時心疼那對還未滿月的龍鳳胎，主動要求捐出肝臟救命。她們當中，有人曾失去媽媽、有人曾因地鐵意外毀容、其中二人經初步評估適合捐肝，正待進一步審核；燕珊的主診醫生解釋，不希望熱心人冒不必要風險，最希望腦幹死亡者的家屬可以慷慨捐出屍肝。 記者：張嘉雯 梁洵瑜
幾經辛苦產下龍鳳胎的李燕珊，因為免疫系統變化，出現急性肝衰竭，昨日情況進一步惡化，早上不能自行呼吸。
「72個鐘內搵唔到就冇得救」
李燕珊的母親說，「醫院話如果72個鐘之內搵唔到（肝臟）就冇得救……如果邊個救到佢，我唔知點報答，做牛做馬我都願，用乜交換我都可以，我呢度兩個BB點算……」
本報昨日接到大量熱心巿民查詢捐肝的可能性，當中絕大部份是女性，不少是媽媽。其中三名女士了解手術的風險後，仍堅持捐出肝臟，昨日傍晚跟燕珊的主診醫生見面。
29歲的黃小姐，本身從事保險業，昨晨閱報後，即時上網查閱捐肝的資料，了解風險，同時查閱保險條文，她考慮後決定捐肝，其父親及男友均支持其決定。
「我自細就冇咗媽咪，明白兩個小朋友嘅情況，喺冇媽媽嘅環境長大，心理上嘅缺陷補救唔到。」黃小姐的母親在她一歲時離家，「媽咪走咗之後，我都試過尋人，但我有嘅資料太少，得個名同大約年歲，」她仰頭看天花板，「我估佢唔喺香港囉，佢生我嘅時候都好後生，可能佢產後抑鬱，我𠵱家大個咗，都體諒佢嘅。」她自言家庭責任不重，工作也容許她休息數月，「我知道我未必捐得到，但未試過就實唔得，對我嚟講識同唔識佢（李燕珊）都一樣，我都係想幫人啫，唯一內疚嘅係做完手術後可能要由別人照顧，我啲單要交畀啲同事跟。」
周女士（化名）今年51歲，早年與丈夫離婚，曾從事地產生意，現時沒有工作，兩名女兒均年過三十，過往是運動健將。2002年，她被人意外推下地鐵路軌，被地鐵撞開17米，右邊面額骨碎裂，腦外膜被刺穿，右眼球爆裂，腦內存碎骨，需連續住院三年，接受過逾10次矯形手術，2004年又被證實患上子宮頸癌，需要切除整個子宮。
面容殘缺的她飽受歧視，在餐廳用膳時，附近的食客均搬走，本身是天主教徒的她，曾埋怨上天殘忍，今時今日已走過了最困難的日子，現在無牽無掛，只希望幫助別人的家庭，「最緊要係我個肝啱，盡力幫佢一啲，我咁樣唔係犧牲，只係互相扶持，如果唔得，唔啱佢嘅，我咪即刻走囉。」
今年40歲陳小姐，去年誕下女兒，昨日在記者勸說下，仍堅持跟醫生見面，「可能係緣份啦，平時睇報紙都冇乜嘢，我見到佢（李燕珊）咁慘，好想幫佢，我唔係一時衝動，救人一命，捱一刀有乜所謂，我生女嗰陣都開過刀啦。」她說已向丈夫交代，丈夫着她自行決定。
兩捐贈者將進一步評核
燕珊的主診醫生、瑪麗醫院肝膽胰外科及肝臟移植科顧問陳詩正與三人會面時，即時查核三人的醫療紀錄，其中周小姐因為身體狀況不適合被否決，黃小姐及陳小姐則需再待進一步審核，其中黃小姐說，「醫生係咁同我講話會有疤痕，話第日游水有條大疤痕，又問我先生（未來丈夫）會唔會介意，我平時都着一件頭泳衣啦，一條疤痕冇所謂。」此外，醫生要求陳小姐與丈夫一同與醫生會面，再了解情況。
除了上述三人，本身是乙型肝炎帶菌者的簡小姐，早前同樣因為身體狀況不佳，需要注射催生針，最終順利誕下一對龍鳳胎，她得悉自己不適合捐肝後，也希望向李燕珊的家人轉達慰問，「我明白佢哋嘅苦況，佢哋本來好高興，嘭一聲跌咗落嚟，好陰公。」
陳詩正表示，不少巿民昨日接觸他，希望捐出肝臟，但他要求各人仔細考慮，「唔可以排除有併發症，傷口好大，會內出血，疤痕永遠唔能夠磨滅，過20、30年後會唔會短命咗我哋都唔知，唔想佢哋第日後悔，呢樣嘢冇得返轉頭。」
3勇敢女士決意捐肝
黃小姐
（29歲）
保險從業員
「我自細就冇咗媽咪，明白兩個小朋友嘅情況，喺冇媽媽嘅環境長大，心理上嘅缺陷補救唔到。」
醫生評核：需再待進一步審核
陳小姐
（40歲）
育有1歲女兒
「可能係緣份啦，好想幫佢，我唔係一時衝動，救人一命，捱一刀有乜所謂。」
醫生評核：需再待進一步審核
周女士
（51歲）
單親媽媽
身體有殘障
「最緊要係我個肝啱，盡力幫佢一啲，我咁樣唔係犧牲，只係互相扶持……」
醫生評核：身體狀況不適合被否決
