宇宙之大，地球之渺小，如果說除人類之外，肯定就沒有其他生命，人類似乎有夜郎自大之嫌，雖然地球有不少UFO個案，引發了不少爭論，亦有不少已被認定為偽造個案，但亦有不少耐人尋味的個案，今日，關於外星生物入侵人類的電影《無恐不入》上映，加上是羅茲威爾事件的60周年，對UFO，還有外星生命，似乎又是一個合時的話題。
記者：張一豪
攝影：譚盈傑
部份照片由被訪者提供
外星人接觸事件簿
外星人有3種族
現存的資料當中，外星人的外形有很多，可細分為很多種，但紀陶將他們分為3大類，包括：灰類人、類人型及DiamondHead。
灰類人
DiamondHead
頭部雖像灰類人，但身材明顯較高，像人類的比例，具高智慧且十分長壽。更有說有3個留在地球很長時間，分別在西藏、蒙古及亞馬遜河內。
類人型
形態跟人類接近，最經典是Billy的七姊妹星人照，長耳外星人與地球女性接近。
唔搞特技玩氣氛
《無恐不入》由《希特拉的最後12夜》的導演奧利花希斯貝高執導，已第四次被翻拍，講一艘穿梭機在大氣層失事墜毀，殘骸散落地球，當中遺留外星病毒，任何人跟它接觸後便會性情大變，判若兩人；當越多人受感染，越多身邊人不可信，世界亦出現巨變。據說本片以1,700萬美元聘妮歌潔曼，加上有全英最高薪演員新鐵金剛丹尼爾基克做男主角，二人片酬已佔成本的大部份，故電影的電腦特技不多，以驚慄氣氛搭夠。
3部舊作
5類接觸電影
《無恐不入》根據香港飛碟學會的分辨，有依附於人體，是屬於與外星人第四類接觸的電影。影評人兼導演林紀陶，推介以下幾部不同類型外星接觸的電影。基本上逢跟外星人有關的電影，都出現第一類接觸的場面，所以不作介紹。
《無恐不入》取材自55年積克芬尼科幻小說《TheBodySnatchers》。香港飛碟學會主席Moon（左）及幹事紀陶竟學妮歌，還大言真有UFO。
第二類：UFO遺留痕迹
《鬼眼》導演禮特沙也馬蘭執導的《驚兆》，講米路吉遜演費城某小鎮的麥田主人，一夜間赫然發現麥田一圈圈的神秘圖案！麥田圈是現時最多個案的第二類接觸之一。
第三類：與外星人接觸
史匹堡早年代表作，描寫外太空的不明飛行物體降地球，一名電線工人親與外星人作面對面接觸。賣溫馨氣氛有別於一般侵略電影，並獲77年奧斯卡最佳攝影。
第四類：與外星發生感情
JohnCarpenter的《外星戀》，講軀體被迫降地球的外星人，以生命能量的形式寄生已故男人，並與其女友經歷一段「跨種族」戀情。被認為是優於第四類接觸經典《ET外星人》的小本製作。
第五類：跟外星生命離開地球
羅拔湛米基斯繼《阿甘正傳》另一感人故事，茱廸科士打演的科學家收到外星訊息，製造超空間旅行機來回異度空間，與亡父重逢。是部有智慧的第五類接觸電影。
外星係有生命 77年大嶼山親見
雖然小記對外星科幻片極有興趣，不過對UFO及外星人的知識所知有限，所以特別請教了香港飛碟學會的主席方仲滿阿Moon及幹事林紀陶講講「飛碟學」。
H：小記 M：Moon K：紀陶
外星人存唔存在？膚淺
H：呢個世界有無UFO，外星人存唔存在？（小記問完就知領嘢，點可能問飛碟學會會員外星人存唔存在？）
K：你問呢個問題都幾膚淺（果然被人反攻），而且證明你對UFO唔係咁認識，UFO，有就肯定，我77年去大嶼山長沙露營時已經見過，而且當時見到嘅唔只我一個人，所以肯定係有，如果以科學精神去睇，就係點樣支持你嘅論據，唔係隨口噏。
M：當然相信存在至會研究，但我只有一次喺墨西哥有過見到UFO嘅經驗，但嗰次我都唔係好激動，因之前我做咗好多資料搜集同研究，加上認識個朋友有第五類接觸嘅經驗，所以我都好平常心面對。我研究飛碟係希望搵多啲資料，證實畀所有人知，越來越多證據顯示UFO真有其事，外星係有生命。
70個外星族探過我哋
H：咁點解好似好多政府都否定UFO？
K：都唔係，有好多政府都持好開放嘅態度去面對UFO，法國國家航天研究中心從今年2月左右，就開始陸續喺網上公佈30幾年來搜集到嘅不明飛行物資料，佢哋大概掌握有3,000幾份關於發現不明飛行物嘅備忘錄，入面好多都係警察同憲兵對目擊者嘅取證筆錄。呢啲資料共有10萬頁之多，長期以來法國不明飛行物業餘研究者一直指摘國家航天研究中心，壟斷同封鎖不明飛行物嘅研究和發現，今年決定公佈檔案資料，除咗增加在不明飛行物研究嘅透明度，最重要就係連法國政府都默認咗UFO存在。
M：97年3月13日，亞利桑納州鳳凰城晚上，出現5、6個琥珀色不明巨大光點，排列成V形，緩慢而安靜咁從西北往東南方飛行，從內華達州，經過鳳凰城然後抵達土桑邊境消失，歷時約3小時，有數千人目擊。當年大肆報道，卻被當時嘅州長塞明頓一口否認，但10年後佢唔再係州長，都承認呢件事係真，而且話當時非常震撼。因為如果政府承認外星人存在，會帶嚟好大政治危機，據資料研究，地球可能已經有過70幾個外星種族探訪過，試諗吓宇宙咁大，地球不過係個小星球，到時無國界之分被統稱地球人，對特別係大國如美國政府好不利。
外星人唔會侵略地球
H：點睇《無恐不入》？
K：又係抹黑外星生物伎倆！但你有無發覺人類科技文明近60年好似進步得特別快，據研究好大程度係同外星人接觸有關，特別係美國，所以佢哋要製造咁多外星生命陰謀論嚟混淆視聽。講真，如果外星生命來者不善，一早就已經對人類發動攻擊，好似《天煞》咁。
M：講套戲嘅話，臨尾真係唔好去廁所，原來幾句就交代咗成件事，去完洗手間，分分鐘唔知發生乜嘢事。不過我同其他幹事都有傾過，外星病毒真係有可能帶嚟地球，到時肯定就唔會好似部戲咁簡單。