日本都只係啱啱開賣，估唔到呢款全新版Mazda2已火速到港！你可能會質疑佢又係「改少少當代表」之流，不過今次Mazda2着實無欺場，不但由外到內以全新面貌示人，有曲線得嚟又唔會珠圓玉潤咁笨，而且喺操控感同性能上，都改良得叫人驚喜，令呢款人氣實用小車，魅力大升級。
記者：黎頌詩
攝影：楊錦文
Model：Mai
偏圓賣相輪廓突出
當呢架保持上一代小巧體形嘅Mazda2出現眼前，第一個感覺係：好醒目！講到整體風格其實同一眾前輩差唔多，但究竟搞乜越睇越有型？再細心睇睇，先發現型得有道理。首先，佢比以前更曲線玲瓏，喺頭冚、頭燈兩側、仲有車身旁，原來都巧妙咁造出咗線條，全靠呢幾條線，一架細車都變得充滿立體感，輪廓更加突出。頭燈形狀亦完全改變，呈長形，面積更大，唔單止睇落更眉精眼企，驚喜嘅係，裏面仲附有細長嘅角燈，好處係出路口時有更佳嘅照明，咁講究嘅設計，喺同級車中極為罕見。
頭冚前嘅入風口亦由較鈍嘅長方形變成半菱角，帥氣就係咁出晒嚟。講到近年嘅大熱元素──跑味，佢一樣畀到你，有晒包圍再加車尾定風翼，簡潔中見風格。車尾線條斜度增加，簡潔而渾圓，再配合全車設計，無疑係比舊作更流線、更有美感。不過女人最Buy，都應該係有12色供選擇，有無諗過，你嘅座駕，都可以同你至愛嘅指甲油襯番晒色？
內櫳圓得好舒服
唔單止外觀，當打開車門，你會發現內櫳一樣充滿曲線；鋪排係跑味嘅延續，典型銀黑配搭，線條以圓形做主打，銀色點綴得頗見心思，顯出別有型格。最突出係中控台大變瞼，波箱係唔少七人車採用嘅前置設計，就手得多。C記最冧中控台上一個個排列有序嘅圓形，有些少跑格得嚟又好趣致。
實際功能係6CD兼可駁MP3機，漫漫長途都有大把歌仔聽，推廣期內仲送埋接駁MP3機嘅Cable，稱唔上高級享受，但就夠實際。唔多覺嘅，仲有座椅靜靜起革命，前排座椅調校角度大為提升，唔理你嬌小玲瓏定係大隻佬，都一樣搵到Fit晒嘅角度；後排座椅更抵讚，連中間位都有埋頭枕同三點式安全帶，穩陣又舒服咗，坐足五位都無抗議啦。
數字跌Watt實際升級
睇番最重要嘅規格，103匹，扭力14.0kgm，齋睇數字，似乎比前一代嘅113匹同14.3kgm稍為DownGrade，查實引擎經過重新調校，輸出增強，扭力亦更平均，加上車身整體輕50kg，車速事實上比前代更快。C記自問係機械白癡，一見到中控台有幾十個掣就頭痛，新嘅Mazda2就令我好得心應手，起步加速暢順，跟住連掟幾個彎，靈活穩定，第一次充滿自信唔使收油，細車嚟講，表現的確出色。就連以前加速時車廂內風聲過大，都有明顯改善。
實試短評
車版C記：鍾意佢夠平易近人，一摸就上手，好啱女仔。
車版丹尼：1.5引擎加速夠爽，前排座位亦算寬敞。
Kari：車細細，但係操控起嚟好有大車Feel。
Mazda2規格
引擎：1,498c.c.直4
馬力：103ps/6,000rpm
扭力：14.0kgm/4,000rpm
傳動：4前速自動波
查詢：萬事得汽車（28931112）
