國泰航空送一千張機票，徵召一百個愛香港的理由，結果有超過兩萬份作品參加比賽，國泰選咗一百件作品做展覽，喺網上及金鐘太古廣場（八月二十四日起）可以睇到。評判有幾位，其中一位係才子陶傑，喺記者招待會上，陶傑發表佢個人見解，聲明與主辦單位完全無關。點解要咁樣講呢？因為陶傑事先冇準備，一上台就靈感上身，一瀉如注，大講「達文西密碼」──從得獎作品睇出政治玄機，譬如一份得獎作品係紅白藍膠袋上有紅色漆油，陶傑就話香港人之喜愛紅白藍膠袋，視之為本土精神一部份，係因為英國米字旗顏色就係紅白藍，袋上有紅色，代表自己成長奮鬥血跡斑斑，本地人好懷念喎！
陶傑仲有對其他作品嘅評語，在場人士聽到興高采烈，估唔到陶傑可以即場即興表演棟篤笑，黃子華未必有佢咁醒。睇完陶傑表演，睇到報紙話台灣明年總統選舉，國民黨推出馬英九蕭萬長（馬蕭配），民進黨卒之在陳水扁推動下，謝長廷搵蘇貞昌做副手，應該係謝蘇配，但民進黨話普通話讀出來，「蘇」與「輸」同音，「蕭」與「笑」同音，變成「馬笑」對「謝輸」，唔好意頭，所以自己話係「長昌配」，台灣政治人物幾迷信吓，但估唔到選總統咁嚴肅嘅事，都可以當李八方咁玩，唔怪得台灣《蘋果》係第一大報。
既然唔用姓「謝蘇」，點解用名唔用「長貞」或「廷昌」而係要用「長昌」呢，可能係「長貞」聽起嚟似「長征」，（貞Zhen與征Zheng，用台灣式普通話讀嚟，分別不大），正值民進黨去中化，點可以用中共名詞吖。好嘞，用廣東話讀，「長昌」與「長槍」同音，好有針對性。「長槍」可以射死隻馬，似係凶兆。用槍射馬，馬邊度有得笑，痛到長嘯更加似，唔會到咗明年大選前夕，又會有槍擊事件發生吖嘛？上述乃係政治八卦，講出來得啖笑啫，靈感來自陶傑解碼。中國人名字，本來就係一個密碼，包含父母對兒女嘅希望，譬如姓馬名力，肯定係父親希望兒子有毅力，勤力，路遙知馬力吖嘛，點知英年早逝，可惜也！