韋斯咸前猛將泰維斯在剛開鑼的英超球季轉投曼聯，身為韋斯咸忠實擁躉的「星級講波佬」馬啓仁（Keyman），最近也由有線跳槽無綫，由細會轉大會，獲無綫力捧做阿叔林尚義的接班人，但Keyman坦言人工並沒有大幅度提高，因為講波以計騷方式算薪資，收費電視反而待遇更好。撰文：戴彩煥
一天，一個乘客上車後跟的士司機說：「唔該將軍澳無綫。」司機問乘客：「你去無綫做乜呀？你有線㗎喎！」乘客笑一笑，然後跟司機說：「我過咗無綫啦！」
在有線講波講足10多年的馬啓仁，本月初已過檔無綫，巴塞隆拿來港踢友誼賽一役，是Keyman首度在無綫開腔擔任評述。
「講龍舟都可以㗎」
大批球迷、網友為Keyman跳槽議論紛紛，質疑他為何不跳槽Now，反而選了一年播映足球賽次數幾乎十隻手指數得埋的無綫，戲言Keyman過檔無綫究竟是為了講龍舟，還是想學鍾志光一樣拍劇？對此Keyman笑說：「講龍舟都可以㗎，拍劇就唔會，我鍾意做主持多啲。我去無綫唔係想講波，係想做一個綜合體育節目主持，好多人以為我淨係講波，其實以前我都有講田徑、籃球其他體育。我同有線咁多年，關係都好好，今次過無綫係工作原因，唔係公司原因，嚟緊北京奧運就係我好想接觸嘅嘢，亦都係我過無綫一個幾重要嘅原因。」
Keyman至愛球隊韋斯咸的前球員泰維斯，在剛開鑼的英超球季由韋斯咸轉投曼聯，細會轉大會，記者問Keyman可覺得自己跟泰維斯相似時，他哈哈大笑說：「咁樣講會死㗎喎！其實呢個譬喻幾好嘅，我自己都有咁諗，不過就唔係細會大會問題，我真係想轉換環境，學多啲嘢。或者咁講，我今次係出國搵食，近年好多國內球員都去外國搵食，第一係賺多啲錢，第二係曝光率高啲，第三係視野多啲，我今次似係呢樣嘢。」
球員轉會費往往相當可觀，但Keyman表示並不適用在他身上，他說：「做我哋呢行係計騷，大家都明，收費電視一定好pay啲，因為騷多，免費電視收入唔會有乜嘢進展，所以我唔會係為錢銀問題。」
客串電影演技差
無綫高層向記者透露，今次力邀Keyman過檔的另一目的，是想找他做阿叔林尚義接班人，Keyman表示多謝抬舉，他說：「咁受重視我當然好高興，接班人只係一個代號，阿叔喺呢行係一個神，唔容易代替，我又唔會好似阿叔咁講波，佢講波好認真，因為佢踢波出身，技術上分析好透徹，講嘢簡而精，技術方面我當然識，但我唔可以一語中的咁講：『佢抵死！』我講波比較生活化、輕鬆啲，因為我本身都係一個咁嘅人。」
阿叔講波之餘，更拍了不少《古惑仔》系列電影，鍾志光也不時在電視劇中客串，問Keyman會否步二人後塵，他說：「做戲我絕對唔適合，我知我表情做唔到乜嘢，但主持或者司儀，我知自己可能會做到。其實前排劉鎮偉都搵咗我客串《出水芙蓉》，做一個游水比賽評述員，係我第一次拍戲，我覺得呢個已經係我極限。
「因為我真係唔識做，我拍嗰段戲係自己一個人喺度講，後面仲有班臨時演員，我覺得佢哋啲戲重好過我。喺我心目中有啲人真係一流，一個係林嘉華，一個係潘宗明，佢哋以前都係做體育節目，做主持跟住做司儀，我諗呢方面比較適合我。」
Keyman過檔無綫為主持奧運節目，然而近日無綫和有線卻為2012年倫敦奧運香港獨家轉播權爭拗不休，問到Keyman有何看法？他有點尷尬地說：「我係無綫人，但亦好關心有線，站喺觀眾立場，我最想係百花齊放，多人一齊做，嗰樣嘢出嚟一定好，如果有線exclusive（獨家），希望唔係全部項目都exclusive啦！」
攝影：仇志德
最愛還是李德能
馬啓仁跟李德能不單止是球迷心目中最受歡迎的講波佬，二人更被視為最佳拍檔，Keyman也坦言最喜歡跟李德能拍檔，他說：「佢會令你覺得好舒服，你講錯嘢佢會幫你兜，你講笑佢會幫你笑，你需要協助時佢會出現，佢係一個好perfect嘅合作人物。」
讚黃興桂夠投入
問Keyman最渴望跟那個講波佬合作？他指是金句多多的黃興桂，他說：「我未試過同佢合作，我非常鍾意佢，同佢好老友㖭。佢講嘢好得意，我覺得佢係男人嘅模範，佢生活態度好好，人生閱歷豐富，做好多嘢都好投入，更重要係佢做人不拘小節。」
問到任足球評述以來最刻骨銘心是那一件事？Keyman說：「係舊年世界盃決賽施丹搵頭撞人嗰場，佢嗰個頭槌都令我哋不知如何是好；事件發生之後你唔可以淨係話畀人知：『施丹搵個頭撞人呀！』唔可以只係話『佢好戇居、好衰』，又或者『對方挑釁』，咁講係冇意義，所以我只可以話畀人知，兩隊個分野係一隊有EQ，一隊冇EQ。」
