呢排睇到唔少有關中國製造玩具嘅新聞，統統與香港有關，譬如自殺而死嘅好老闆張樹鴻就係香港居民，自動向美泰（Mattel）報料話玩具漆油含鉛量超標嘅蔡志明係香港玩具大王。香港玩具廠商早三十年已聞名天下，一九八幾年開始，玩具廠全線搬入珠三角之後，更憑藉廉價勞工與廉宜土地之助，大肆擴充，將台灣與南韓玩具廠打低晒，今時今日，香港玩具廠商在玩具製造方面，雄霸天下。美國啲玩具大公司，全靠品牌與知識產權賺大錢（例如芭比洋娃娃），美泰如果唔向珠三角香港玩具廠訂貨，走得去邊呀？如果美泰可以向印度、印尼、泰國、越南買到更平嘅貨，佢老早做咗啦。
廿零年前某月某日左丁山到番禺睇廠，為玩具廠做財務顧問，安排在納斯達克市場上市作事先「盡職審查」。間廠當日出產米高積遜肖像公仔，幾趣致。有一條生產線將公仔源源不絕咁送出嚟，生產線女工只有一個動作（或工序）要做，就係替米高積遜公仔梳頭一次，動作甚為機械化，但要梳得好快，否則會梳唔切，第二隻公仔又送到眼前。問生產線科文：「女工人工若何？」科文答：「十蚊人民幣一日，比香港女工平十倍，我哋比香港請多五倍工人，生產能力大增，成本仲少咗。」就係咁簡單，香港工廠冇法子唔全部北移，不斷擴充。呢間廠嘅母公司後來在納斯達克上市，不過唔係左丁山間公司經手，因為我哋在審查期間，與老闆意見不合也。其實當年只要左丁山與老闆讓吓步，單生意就係我哋嘅，自己卒之做唔成大賓架，早有先兆。
張樹鴻自殺前據報紙講先在香港賣樓，籌錢向員工支付薪水，真係好人一個。佢嘅同行喺八月十七日刊登全版廣告，號曰「祭文」，以白話寫成。左丁山不才，以為嗰篇係悼文，不是祭文，祭文有祭文嘅寫法，識寫嘅人愈來愈少，試看余伯樂引王亭之祭董驃文一段：「幼遭危難；遂成孤兒。長而立志，馬圈名馳。污泥不染，不蔓不枝。立言正大，公眾是依。一言雷動，發揭奸私……」寫祭文，我哋有排學，千祈唔好誤把悼文作祭文。