官恩娜、王喜、湯盈盈同吳家樂前晚喺將軍澳錄影節目《味分高下》，官恩娜同吳家樂一組，佢哋憑一碟芡汁，估中「蠔油海參鵝掌燴鮑魚」呢味餸，當官恩娜拮起鮑魚時竟大叫話：「喂，你睇吓我隻鮑魚。」即俾鄧健泓寸話：「好wild，叫人睇佢隻鮑魚。」王喜更在旁講有味笑話。
當佢哋玩「特別新聞」環節時，官恩娜同湯盈盈分別要蒙眼分辨食物，官恩娜憑嗅覺分辨唔到牛扒同拖鞋，結果佢同吳家樂都要舔拖鞋，湯盈盈就估中腐竹糖水，不過佢同王喜為咗多5,000蚊獎金，竟然肯舔浸喺糖水入面嘅孖煙囪。最後王喜同湯盈盈一組玩「身家大轉移」時贏咗，佢哋本身有33,500蚊獎金，仲贏埋官恩娜同吳家樂嗰組嘅18,000蚊成為大贏家，官恩娜一組只得5,000蚊安慰獎。
事後官恩娜大呼好慘，話隻拖鞋有膠味，不過啲汁好香，問到可覺節目糟質藝人舔底褲拖鞋，怕唔怕被投訴？官恩娜話：「又唔係浪費食物，又唔係教人食拖鞋，純粹遊戲節目開心。」
旅行肚屙冇癮
此外，官恩娜噚日去銅鑼灣時代廣場出席一個鑽飾活動，佢戴住總值1,000萬嘅鑽飾，啱啱同兩個女仔朋友去布吉旅行返嚟嘅官恩娜，話今次旅行好掃興，三個女仔水土不服輪流屙，屙到連影相都冇心情。
