男人成日話女人坦蕩蕩無神秘感，遮遮掩掩，做吓樣左冚右冚、若隱若現先最惹人遐想。講到男人嘅另一至愛——車，都係同一道理，要扮靚樣？首選都係「包」，之唔係加包圍囉。就係咁包一包，當堂型咗又醒咗。有辦你睇，Honda呢架Crossroad本性已夠剛陽，新版升級埋無限（MUGEN）包圍更見硬朗，比舊版更見誘惑！
記者：黎頌詩
攝影：梁細權
Model：Naomi
2.0頂級版
年初本田推出全新Crossroad，屬近年大熱的多用途七人車，外形比先前推出的熱賣車種Stream明顯硬朗，方匣子車身，線條以方角為主，如果話Stream適合住家男人，咁Crossroad可以話適合後生型仔。由於本田一早將Crossroad定為內銷車款，所以喺香港「撞車」嘅情況相對大為降低，咁當然就更吸引一批最想與眾不同嘅車主。早前有車行曾引入Crossroad1.8入門版，今日呢款再升級，除規格上提升至2.0外，外觀上亦加有MUGEN包圍，睇起嚟更為粗獷，更有猛男味道。
黑色裝甲車
無限MUGEN包圍，一句講晒：提升跑味！基本版嘅Crossroad，睇落四四方方，各個部份嘅線條都呈方形，加上車身份量十足，本身外形已經相當霸道，甚有LandRover嘅影子。𠵱家喺黑色嘅車身再加上全車包圍，惡得嚟簡直有啲似裝甲車，剷出馬路，肯定人人忌你三分。
其他的型仔裝備就集中喺車尾，定風翼同擾流器都係跑格嘅標誌，令原先嘅雙出式尾喉睇落都型格唔少。除咗更睇得，實用性方面都有搞作，車窗加上了雨擋，而胎軨亦由原本的鋼鑄換上鋁合金，穩健、耐用性同美觀度都有提升。睇埋車頭，呢個2.0版本仲有埋霧燈，照明效果又升級。講真，咁有風格嘅外觀，可以話係呢部Crossroad最吸引人嘅地方。
內櫳未見驚喜
Crossroad強調多用途實用性，內櫳設計未見花巧，3排7座位，空間感一般，不過與本田另一個熱賣7人車款Stream比較，後排嘅感覺似乎較為舒適。尾排可拉低，提供更多載貨空間。而座椅就有耐髒功效，唔怕你玩到周身邋遢爬上去，明顯顧及多用途嘅需要。
再睇中控台的設計，明顯是硬朗外形嘅延續，線條簡單利落，硬橋硬馬，不過軚盤前方4個排列不規則且大小不一嘅顯示錶，仲有左手邊嘅幾個圓形操控鈕，竟又巧妙咁帶嚟一啲活潑嘅感覺，值得鼓掌！波箱、操控按鈕同軚盤集中歸一，設計夠就手，咁兩個前排座椅之間都變成收納空間，呢點我C記就最Buy。
外表粗豪內裏斯文
MUGEN版Crossroad外形充滿力量感，大大嚿夠霸道，不過一揸上手就發現佢外表粗豪、內裏斯文，攀山越野明顯唔在行。2公升i-VTEC慳油引擎，前輪驅動，5前速自動波箱，操控平易近人。
呢日喺大雨下同佢一齊上斜落斜轉彎抹角，由於整個車身相當高，駕駛時視野夠開闊，唔錯。一路上行車加速表現都相當暢順，彎位夠穩定，但唔算靈敏，各方面表現平穩，只係斜路起步時似乎有點乏力。講到尾，如果想你嘅日常座駕用途多多，又可以喺馬路上耀武揚威，呢架Crossroad都幾啱要求。
HondaCrossroad2.0規格
引擎：1,997c.c.直4SOHC
馬力：150ps/6,200rpm
扭力：19.4kgm/4,200rpm
傳動：5前速自動波
查詢：富利堡（23330747）