聯儲局突然在八月十七日星期五美國早上時間，在紐約股市開市前宣佈削減貼現率半厘，理由係金融市場情況惡化，可能影響實質經濟。呢個係藉口啫，實際上可能係聯儲局受到華爾街大鱷嘅壓力，經一番折騰之後達成嘅妥協。對冲基金及投資銀行最想即時減息──即降低聯邦基金率（FedFundsRate）現時係五厘二五──嚟刺激樓市，𠵱家聯儲局只降低貼現率，由六厘二五減到五厘七五，減輕銀行向聯儲局借貸成本，算係一人行一步。一般而言，銀行如果在市場借到錢，唔會向聯儲局提交抵押品借短錢，因為貼現率本來就比基金率高出一厘，向聯儲局貼現，係銀行在市場求借無門之下，先至行嘅最後一步棋。
實質上，聯儲局早已向市場注資幾百億美元，銀行體系資金充足，何以銀行仲要向聯儲局貼現求助？梗係銀行唔信銀行，怯於放款啦。如是觀之，信貸收縮嘅情況，仍然存在，杜瓊斯指數在八月十七日一開市就升三百幾點，係心理因素與急補空倉盤，收市報升二百三十點，升幅減少咗。唔好迷信以為減息之後，股市必升。聯儲局喺二○○一年開始減息，連減好多次，股市要到二○○二年先至真正反彈。大禍（上次係科網股爆破，呢次係次按爆破）過後，要有一段時間畀啲基金經理忘記燒手指、斬手指嘅痛楚之後，大市先至會再度活躍。
事後孔明，睇嚟美國大鱷有內幕交易之嫌，用美國報紙誣告香港嘅說法，紐約不配成為國際金融中心。乜唔係啫，杜瓊斯指數在八月十六日星期四原本跌三百四十點，尾市急升，收市只係跌十五點，仲唔係有啲春江鴨聞到風聲？到咗八月十七日香港下午，歐洲早市，港股加速下跌超過千一點，竟然半小時內大翻身，收市只跌二百八十五點，同時間歐洲股市大升。當時邊啲人買貨買得咁急，拼命掃中移動、滙豐同埋一啲二線股呀？佢哋唔通係睇過水晶球，知道四小時後聯儲局有宣佈？美國證監會夠唔夠膽查呢？香港證監會不如搵啲大經紀大基金問吓話！