早幾日，孫柏文覺得，平時作為一個散戶，已經好似俾啲大鱷拋嚟拋去咁，非常被動。不過今時今日，就連啲大鱷都被時世掟嚟掟去時，作為散戶，更加完全無助。
不過，如果大家冇跟噚日個市，淨係睇吓啲收市價同點數，突然間郁都唔郁，更加得人驚，亦都可能有好多疑團。
大陸股唔講，淨係見恒指升133點，得嗰0.6%，以呢排嘅波幅嚟計，真係好似冇郁一樣。不過，同時又見到金融類嘅港交所（388）升6.2%，但係滙豐（005）又跌1.3%，真係搞到人𢱑晒頭。
強國對壘結果難料
如果要孫柏文好簡單咁解釋今日嘅情況，我就會用我姪仔本《小學生圖解成語詞典》裏面嘅「自相矛盾」嚟做比喻。話說，家陣特區股市，有兩個敵對，但又強大嘅力量對壘︰一邊，係一支無堅不摧嘅矛（花旗國信貸危機），加一塊水火不侵嘅盾（祖國澎湃嘅資本）。答案係乜，讀過小學都明白，呢啲哲學嘢無謂多講。
花旗國，大家都知會死得好肉酸。次按風暴已經蔓延到其他國家同信貸工具，全世界央行都開大水喉救火。撇開伯南克呢個學院派擺明要爆佢一大鑊，就算真係要救，各國政府都未必有能力搞得掂。政府做啲嘢，當係表吓態囉，大家都係無謂放上心。滙豐，又點會有得升？
另一邊，係大家都知祖國鈔票氾濫到連豬肉都炒到飛天，炒股嘅就話唔怕買貴啫，其他嘢真係貴啲都暴動。撞啱今年又真係周圍都落大雨，到處都水浸，食物真係唔可以貴，無可奈何之下，點都要排洪。幾十萬億嘅人仔存款，真係隊落香港，炒乜都好啦，一定要響特區唯一嘅港交所買嘢。
港交所實發過豬頭
港交所不但喺香港壟斷，更加可以話係全世界唯一合法吸納中華人民共和國資金嘅壟斷，仲唔發過豬頭？升6.2%，升少咗啦！再重複一次，係幾十萬億存款嘅集散地！升6.2%，升少咗啦！
大家，跟住我唱︰「起來……」
金手指網誌： http://phatdat.blogspot.com