噚日長實（001）喺天水圍嘅栢慧豪園開售，點知同係長實嘅嘉湖山莊就有銀主劈價甩貨「贈興」。不過，接近大半年冇新盤推，長實首先推出天水圍栢慧豪園，中原同美聯（1200）兩個主要代理體系，當然打鑼打鼓助興，幫米飯班主攞番個彩啦！
分行化身展銷廳
講番呢個盤，由初初吹風話諗住賣，到不斷話就賣得，起碼超過一年，中原、美聯對於呢場久違嘅新盤硬仗極度重視，甚至將區內幾間主要分行，全面化身為栢慧豪園展銷廳兼諮詢中心，櫥窗外面貼滿栢慧豪園嘅宣傳標語，如果唔睇招牌，仲以為長實咁重本，整咁多個小型售樓處。
其實代理全情投入搞新盤，唔算新奇事，不過，一來全新盤戰線靜咗咁耐，二來天水圍都有四年幾冇新盤推出，所以班經紀都極度緊張，中原營董方啓明話，早喺今年初已經陸續增加天水圍分行人手，𠵱家比舊年底多咗三成以上，而每間分行起碼有八成人手專打新盤，可謂不成功便成仁。另一邊廂嘅美聯，幾個區頭都忙住開作戰會議，未有向華華透露最新部署。不過，單以美記有啲分行噚日幾乎全日鎖舖，就估得到佢哋有幾咁緊張。
地方勢力擴客源
天水圍上次推新盤，亦係長實有份嘅慧景軒，喺03年沙士期間推盤。今次嘅栢慧豪園，原本已經喺天水圍嘉湖銀座搭好晒售樓處同示範單位，聽講仲有四個示範單位㖭，但長實暫時只係集中喺紅磡賣樓，即使喺天水圍撈到客，要跑出去紅磡簽單，一來一回起碼三個鐘，真係冇番咁上下人力物力都搞唔掂。
新盤佣好賺，係代理行內共識，但係一味打人海戰術，簽單為上，長遠嚟講真係唔多妥。不過，對於一啲小型代理行嚟講，今次可能係一個擴大客源嘅良機，好似大西北地方勢力祥益地產咁，雖然都有份參與栢慧豪園嘅促銷工作，但就堅持話唔會放棄二手為主嘅方針，仲話有信心嚟緊一個月搶佔區內七成二手成交㖭。
[email protected]