人行「突然」調高利率，但對港股冇乜影響，一來係加息嘅幅度唔大，二來市場已經預咗會加息，所以冇「突然」嘅感覺，加幅唔大，從另一個角度睇，仲可能係短炒嘅好消息，昨日A股同H股都有唔錯嘅表現。
花旗嗰邊仲係俾信貸危機陰影蓋住，伯南克、保爾森同國會議員見面講信貸危機之後，冇乜新意，花旗股市冇乜反應，橫行偏軟，睇嚟都係等緊新消息，見到咁嘅情況，港股班好友攝位再炒一轉，昨日恒指就挾高617點收市，不過睇成交唔係太多人跟，咁都正常嘅，呢排港股日日過山車，股民都未暈完浪，邊度有膽入市？
之不過睇番啲國企股升得幾有勢，可以搵番一兩隻短炒，保險股受國內加息刺激，齊齊炒上，應該未炒完，短炒上升空間吸引，值博率唔錯。
國壽C輪9074：國壽（2628）昨收32.40元，股價連續第2日企喺20日線，成交縮咗一半，有利今日以大成交炒上，若破高位34.10元，短線可試36元個位，可以買啲國壽C輪9074，昨收46仙，有效槓桿率4.9倍，正股升上36元，9074應該喺74仙樓上，正股跌穿30.80元止蝕。