港股繼續大升，迎接北水自由行。恒指噚日就以接近全日最高位收市，報22346，大升617點，而期指更大升807點，收22407，轉為高水61點，國企同內地概念股繼續被大力追捧，H股指數亦有近400點進賬。
全靠北水自由行，港股先可以急跌後，在短短3個交易日內，出現DeepV式反彈，唔單止收復一連3日急挫2000多點的失地，恒指仲上番10日、20日同50日平均線之上，形勢完全改觀。
由於有大陸「照住」，一直以來，對港股都好有信心，即使調整，幅度亦唔會大，跌後亦會迅速反彈。全球股市經歷過美國的次按風暴後，都有不同程度的傷害，以港股噚日收市同7月底的歷史高位23558比較，跌幅5.1%，唔算太嚴重，但係由於呢幾個交易日內，急跌暴升，股民財富又一次大轉移。
短期市勢有可能在22000關口橫行整固，到北水自由行大軍殺到，再破位而上，下一個升浪，唔排除會再創新高。
中國鋁業（2600）連續兩日急升，前天升7%，昨天升16.8%，高收15.54元，比今年高價16.28元只相差4.55%。
五礦資源（1208）同樣係經營鋁業，「晒士」當然冇得同中鋁比，但在北水自由行的大氣候下，五礦在內地亦有好高知名度，同樣會成為熱捧的對象，由於其股價表現落後大市好多，一發力，短期內升勢會好勁。
有機會透過注資壯大
上月中，五礦高位5.81元，跌市最低落到2.88元，噚日收3.77元，同高位相比，仲低成35.1%，大落後。現時股價剛重上10日線，若升破3.80元的小旗形阻力，短期量度上升目標係4.72元。
睇好五礦，有兩大理由。第一，五礦係內地大型氧化鋁進口商，佔約三分一市場，中鋁業績報告指氧化鋁價格將回穩，對五礦的經營好有利。06年（12月年結），五礦盈利8.65億元，每股盈利0.50元，07年每股盈利可上升至0.55元，以內地股民仍屬「㗳糖」的12倍PE計，股價已可升上6字頭。
第二，五礦母公司五礦有色金屬擁有龐大礦藏資源，唔排除在適當時間進行注資，令五礦「晒士」快高長大。