今年初中信泰富（267）主席榮智健大仔榮明杰，升咗做集團副董事總經理，成為董事總經理范鴻齡以外嘅集團三哥，所以榮太子幾時退休呢個問題，變得更加敏感。
噚日中信泰富公佈中期業績，預咗會畀人問幾時退休嘅榮太子答：「公司係藍籌亦係紅籌，接班人嘅決定，唔係我一個人話事，要由董事會決定，揀一個有能力嘅人。」華華記得，舊年啲人問佢幾時退休，太子都係咁答，乜阿仔能力唔夠咩？
仔女低調少曝光
華華係一般百姓，當然唔咁冒犯太子，但係話晒佢都六十有五，問佢有冇諗過幾時退休，點知佢話：「未有打算。」跟住仲挺起胸膛話：「你睇，我仲好年輕嘛。」真Man！
至於小太子榮明杰現年應該只有38歲，93年俾老竇安排入中信泰富，負責主管上海事務，所以大部份時間都留喺上海總部。舊年中信泰富公佈一個喺上海嘅百億元地產項目，搵咗小太子主持，即時成為焦點，但佢好少發言，多數都係由范鴻齡代答，低調嘅小太子似乎唔多習慣見傳媒，睇嚟呢方面仲要浸耐啲。
除咗阿仔，榮太子仲有個女榮明方可以接力，不過今年35歲嘅榮小姐比阿哥仲低調，佢係中信泰富信息科技副主席兼東隧董事，主力睇數。佢會唔會接棒暫時未知，但興趣方面肯定一脈相承，因為兩父女都咁鍾意賽馬，阿女都養咗隻愛駒叫「逍遙派」，老竇嗰隻就叫「長驅」。另外，父女一樣鍾意出海，前幾年有傳榮智健買咗艘逾千萬元嘅遊艇畀愛女㖭。
[email protected]