AC米蘭主場唔好叫聖西路，改叫老人樂園罷啦！點解咁激？佢哋啱啱用350萬鎊（約5,600萬港元）簽咗皇馬嘅31歲中場艾馬遜，初步屈指一算，AC最強陣容平均年齡係33歲！
根據《米蘭體育報》網站嘅AC28人名單，平均年齡係29.6歲，3字頭有17位，2字頭8位，4字頭1位。落場踢波唔同落公園捉棋，你估淨係講經驗咩？或者AC近年走老人院路線贏到歐聯，於是又攞住張舊藥方照執囉！
不過，求大俠覺得AC應該睇遠啲，建立一支有朝氣嘅球隊，如果唔係新球季可能仆直！好似呢個艾馬遜咁，皇馬嫌佢上季老化，追波慢誤傳多，新教練蘇斯達存心趕佢走，點知AC副會長加里安尼仆到去買！
「大哨」料唞一個月
最離譜係34歲嘅前法國國腳巴亞都回巢，佢上季效力意丙球隊華利斯，04至05年仲效力土耳其同瑞典球隊。點知上季歐聯決賽對利物浦，巴亞隨隊出發結果順利捧盃；都唔知AC係咪貪佢腳頭好，於是多個人多雙筷，簽埋過檔。
我求大俠唔係歧視老將，不過老人家零件舊，容易傷！好似艾馬遜同鄉朗拿度咁，前幾日仲好哋哋搏命備戰新球季，點知周二就話膝頭風濕發作，周日意甲揭幕戰對熱拿亞要缺陣，仲可能要休息一個月㖭！你話，AC係咪攞嚟衰呢？