新鴻基地產（016）三佬郭炳聯老婆劉寶賜，上個月坐飛機同空姐爭執，搞到機長報警，上晒報紙頭條，都算黑！
今日三佬又見報，不過就係光宗耀祖嘅好事。郭炳聯「獨家」攞到國際財經雜誌《Euromoney》嘅亞洲金融巿場發展傑出貢獻終身成就獎。過去攞到呢個獎嘅人唔止一個，但今年就只得郭炳聯一人獨得，佢仲係第一個港人攞到呢個榮譽㖭，可以話係為港人攞番個彩，最緊要係將太太劉寶賜早前拉低咗嘅分，提番高啲。
港攞頭彩兼獨得
其實，個獎係喺前幾日嘅「2007亞洲財經界優秀企業」頒獎禮度頒發，《Euromoney》編輯CliveHorwood讚新地策略清晰而且穩陣，喺香港起嘅樓，唔少仲成為地標。
新地樓一向都係品質保證，郭家亦一直好顧及形象，之前三嫂搞到咁大鑊，好彩老公爭氣。所以華華幾時都話，女人幾叻都係假，嫁到個好老公先至係一生最大成就。