唔經唔覺，由學院轉入官場嘅陳家強，做咗財經事務及庫務局局長已經50幾日，作為一個學者，早已習慣落筆千言，由馬時亨嗰時已經開始寫嘅「局長專欄」，家吓由陳局長執筆，自然係難佢唔到，而陳局長首篇專欄，經已喺8月12日（即係上個禮拜日）面世，題目係《抓緊資產管理發展勢頭 鞏固國際金融中心地位》，齋睇條題就知壓得吓場啦！
處女作夠份量
新官上任，除咗上京之外，梗係要各方人士見吓面，噚日輪到見傳媒，之不過，陳局長今時唔同往日，家吓極度口密，上個禮拜見京官嘅內容，無論大家點問點探聽，佢都唔肯漏半句口風，反而叫大家幫佢諗吓下一期寫咩題目。唔使講，𠵱家除咗內地散戶炒股自由行，就梗係次按啦。
華華好贊成佢篇局長處女作論點，即係香港今後要強化作為資產管理中心嘅地位，只要香港能夠成為一個深水儲水池，憑住內地居民越嚟越唔嘢少嘅富裕程度，無論內地金魚缸幾咁好炒，炒得咁上下，始終會落嚟香港炒埋港股，有咗呢支大水喉射住，就唔怕冇海外或者中國公司嚟香港上市啦！