阿爺幾時發3G牌、幾時將個行頭大執位，繼續成為傳媒必問、而答案又一定係「沒有新消息」的熱/悶爆問題。上個禮拜派成績表嘅中移動（941），王總建宙就係咁應酬咗大家；噚日輪到8號仔好知己網通（906），董事長張春江再次畀到華華驚喜，以「四個兒子」論，同大家分享下3G同埋重組有無大細超嘅心得!
春哥話，幾乎每次南下都會俾大家問呢兩個問題，所以今次見大家之前已經做定功課，諗個新答案以免大家聽覺疲勞。
佢話每年人大工作報告都有講點樣深化改革電訊業，證明國家領導人好重視呢個行業嘅改革，而國家喺每間企業都揸住至少75％股權，就好比有四個仔，咁作為爸爸媽媽，正常係一視同仁看待四個仔，唔會希望個別其中一個特別大、特別壯。
𠵱家四個仔都身體健康，無話有人特別肥、有人特別瘦，咁佢哋有無俾其他兄弟「恰」？春哥就話，有委屈先至會搵阿爸阿媽投訴！
有委屈搵阿爸投訴
佢又話，從四年前開始，傳媒、分析員、專家陸續都有提出唔同嘅重組版本，乜嘢組合都傳過，而每次被傳重組嘅企業，股票一定會漲，證明投資人都對重組有熱切期望。
咁，即係幾時重組呢？春哥話，呢個係一個複雜嘅過程，政府要考慮到每個利益交易方嘅好處，網通都好熱切盼望瓜熟蒂落嘅一日……
其實都係太極團帶大家遊花園，但春哥嗰份誠意，華華收到喇！