【本報訊】兩周前，剛誕下可愛龍鳳胎的李燕珊，用籃子放好兩個小孩，笑意盈盈挽在手上逛街、覆診，引來街坊好友的羨慕目光；這一刻，她因為產後免疫系統改變，出現急性肝衰竭，陷入昏迷，若未來六天等不到合適肝臟進行移植，就要跟一對小孩兒訣別。 記者：張嘉雯、白琳
「BB唔好喊啦，做乜喊呀？」「爸爸，嫲嫲點解喊嘅？唔好喊啦，姑媽係咪死咗呀？」李家的大廳昏昏暗暗，只有小孩子四處逗大人，把不應說的，都說穿了。兩周前，李家一家八口還是喜氣洋洋，歡迎新生命的來臨；這一刻，他們只是苦候奇迹出現。
李燕珊今年37歲，與丈夫認識11年，8年前註冊結婚，其後曾三次懷孕，經歷過兩次流產，一次宮外孕，切去了一邊輸卵管，但仍然堅持生小孩，李媽媽當時曾勸女兒，「我話有BB同無BB都唔緊要，但佢話有個BB嘅家庭先至圓滿。佢好錫阿哥細佬啲女，見到BB就買嘢畀佢哋食。」
第四次懷孕 內地安胎
去年第四次懷孕後，燕珊聽從醫生勸喻多休息，於是辭去售貨員的工作，不再「擒高擒低」，還與丈夫到內地安胎，其間尋訪名醫，只為小孩能平平安安。臨回港前她還買了大堆BB衫、奶樽、奶粉，其夫說，「佢成日話要慳啲慳啲，要留番啲錢畀細路仔。」
孩子的預產期原定是9月8日，上月底李燕珊回港覆診時，被驗出血壓高並有輕微糖尿病病徵，肝功能更出現問題，惟有提早誕嬰，7月底在瑪麗醫院注射催生針，8月1日剖腹產下龍鳳胎，一家人欣喜不已，為小姊弟取名王鈺雯、王鈺霖，希望他們平平安安，快高長大。當了婆婆的李媽媽更是喜上眉梢，「佢同我講，話一個似佢，一個似daddy（爸爸），鼻又高，眼又大，兩個唔知幾開心。」
急性肝衰竭 昏迷至今
李媽媽憶述，8月初女兒出院後，一直沒有胃口，想餵人奶、抱BB也沒有力氣，「見佢面色差，食唔到嘢，塊面又黃，仲以為係身體唔適應。」至周一，燕珊丈夫剛替兩名嬰孩洗完澡，把孩子抱給燕珊，燕珊卻突然昏迷，即時送往急症室。
燕珊送院時出現急性肝衰竭，現於瑪麗醫院深切治療部留醫，情況危殆，其夫說，「佢𠵱家肝昏迷，叫極佢都叫唔醒，我帶兩個細路嘅回鄉證同相畀佢睇，佢都無反應。」
燕珊的主診醫生、瑪麗醫院肝膽胰外科及肝臟移植科顧問陳詩正表示，燕珊本身是乙型肝炎帶菌者，但情況輕微，相信是產後免疫系統出現變化，令肝功能衰竭，此情況極為罕見，暫時只能用血液透析系統把體內毒素排出，並須盡快接受肝移植，「如果唔做係唔會生存到，佢𠵱家嘅生命係以day（日）計，冇可能捱得過一個禮拜。」
家人往驗血 不合捐肝
一家人都後悔當初不勸止燕珊生育，李媽媽說，「佢真係好想要BB，連條命都唔要，之前嗰次宮外孕，佢淨係識擔心冇咗個BB，冇諗過自己，估唔到佢生咗BB後會搞到咁，亦都冇諗到乙型肝炎咁嚴重，如果早知係咁唔畀佢生，第日兩個BB點算？我唔想見到兩個BB咁細個就冇咗個媽咪。」
周一晚上，燕珊的丈夫及五兄弟姊妹輪流到醫院驗血，結果一次又一次失望，全部人的身體狀況均不適合捐肝，燕珊妹妹說，「屋企湊湊埋埋10個人，都冇人捐到畀佢，點解會咁？」
由於燕珊的情況危急，現時在肝移植輪候名單上排第一位，陳詩正呼籲腦幹死亡、因中風或交通意外死亡人士的家屬，慷慨捐出死者器官，「如果唔係就算排第一位都冇用，我哋𠵱家一個器官都冇，都冇得做，有超過九成人因為冇機會等到屍肝而過身。」
