簡sir搵咗普渡眾生嘅觀世音鎮場淨化港交所戾氣，祥和到令港股彈番上去，加埋阿爺送大禮承托吓個市，睇怕港股同埋班散戶有排都唔使求神拜佛。唔知係咪咁，先排喪吹風話會嚟香港上市嘅河南少林寺，佢哋個CEO（其實係方丈至真！）釋永信噚日同新浪財經講，已經同河南政府溝通咗，話「有關登封市部署少林寺觀光旅遊業務08年下半年來香港上市是假新聞！」
假新聞？但睇番啲報道，明明係登封市常委裴松衛（管理少林寺嗰位兄台）爆響口話plan緊出年下半年A股上市喎，仲話少林寺每年門票收入有成億八人仔、淨賺都億五，仲未計其他收入，而持有MBA學位嘅釋方丈更話明，少林同商業沾邊只係為咗弘揚傳統少林文化、擴大佛教事業，勢估唔到，出家人都會出爾反爾，相信幫佢哋搞上市嗰間行，呢鋪應該看破紅塵，領悟到錢財乃是身外物。
講開又講，十八銅人唔落香港骨水，阿爺不如諗諗叫臥龍熊貓基地南下，集資養國寶搞繁殖，會唔會比將佛門清淨地染到一地銅臭更有意義、更名正言順呢！