𠵱家啲細路真係唔講得笑，最近9歲神童讀大學單新聞固然成為城中熱門話題，估唔到英航想改善機艙服務，都要搵班細路幫手，成立咗一個「環球兒童委員會」，喺全球各地搵咗10個小朋友做顧問，其中一個係今年11歲、讀緊小拔萃嘅香港代表廖楚翹。
英航嘅公關噚日話，小小顧問團早幾日去完英航倫敦總部開會，班細路其中一個最有興趣改善嘅地方，係航機上嘅科技用品，建議喺座位安裝一個小型鏡頭，可以睇到駕駛室嘅情況，以及增設連接MP3嘅播放器設施，用以下載音樂同播放足球賽事。
細路即係細路，佢哋都係貪玩貪食嘅，顧問團建議喺登機櫃位有小丑同魔術表演，機艙入面就增設遊戲空間，仲要為所有小朋友乘客提供朱古力。好似廖楚翹就建議，兒童餐應該加多啲鮮果乳酪、薯條呢類嘅食品，先啱小朋友口味。英航公關話，𠵱家公司研究緊佢哋意見，如果可行嘅話，會盡快喺短期內實行。
逢周一至周四刊出