股民最無奈嘅，莫過於買嘅股停咗牌，仲要一停就三年幾。講嘅係大凌集團（211），隻股自04年4月21日停牌到家吓仲未復牌。呢三年幾個市都唔知升咗幾多，散戶當年斬纜買過第二隻，家吓可能乜都賺番返嚟。
一班小股東忍無可忍，登廣告要求監管部門解釋都冇用，只得大凌上月出通告提過對小股東表示無奈同歉意，加上上年業績成功扭虧為盈，所以會同股東分享成果，除咗之前話每股大凌有0.22仙股息，噚日仲宣佈每人送一份禮品，只要攞埋股東證明文件，去大凌企業、長雄證券或同步企業傳訊，就可以換領禮品喎。
禮物係乜未開估
至於係乜嘢禮物，消息人士話，曾經有人提議過包場請股東睇戲，又有人話直接送戲飛，但後尾又有人話食落肚好啲，不如送月餅、紅酒……咁究竟送乜呢？Sorry，消息人士話𠵱家仲未開估！