勤＋緣（2366）除咗製作劇集，近期更斟埋內地兩個電視頻道嘅廣告經營權。行政總裁梁鳳儀話，勤＋緣唔只做廣告外判包銷，實際上係將整條頻道包裝發展。
佢好豪氣咁話，如果一毫子折扣都唔畀客，勤＋緣明年嘅廣告收入應有33億人仔，如果再斟多兩個電視台做，09年初搞分拆都得。問題係，佢一毫子折扣都唔畀，仲有冇客呢呵？
佢仲話，勤＋緣股價升破新高嗰陣，市盈率都只係25倍，分拆可以提升真正價值。不過，講講吓又話，分拆係好初步嘅構思，𠵱家董事會成員嘅諗法非常極端，佢自己認為如果勤＋緣PE升到50倍就擱置，事關佢好buy公司喺「內地電視廣告平台王國」呢個概念。
至於點發大盤生意？勤＋緣啱啱搵咗「廣告三公子」饒恩錫做廣告附屬公司嘅行政總裁，此君喺83至85年係ATV廣告部阿頭，成功將亞視扭虧，之後做過廣告公司麥肯同艾吉斯嘅高層。