去到噚日中午收市，孫柏文覺得今個禮拜嘅股市，將會同上個禮拜一模一樣（見圖）。噚日開市同上個禮拜一模一樣，受到對上嘅禮拜五聯儲局出手影響，裂口高開，跟住橫行。
如無意外，橫行應該繼續到下午收市。歐洲同花旗國嘅禮拜一股市，就會因為消化聯儲局出手消息，一樣都係橫行。繼而令特區股市喺禮拜二繼續橫行。
不過，到歐洲同花旗國嘅禮拜二，就會因為再有金融機構出事消息傳出，令佢哋跌到一仆一碌。跟住特區股市就會喺禮拜三裂口低開，跌勢亦會持續到禮拜四，同至少禮拜五上午。當然，絕不能排除喺花旗國禮拜四晚上時分，即特區禮拜五上午，聯儲局嚟次秘密會議，到禮拜五下午，就有啲番鬼佬大行進行「春江鴨」活動，見貨就掃。
大陸散戶會買乜？
作為一個淡友，就算上禮拜五出現《大時代》奇迹日，全個禮拜都係跌好多。所以如果今個禮拜翻版，淡友絕對收貨。
最弊，呢個「戰狼300」式淡友圍攻好友嘅計劃，就好似當年戰無不勝嘅蒙古軍，東征日本時，遇上日本人所稱嘅Kamikaze「神風」！淡友被殺個措手不及，屍橫遍野。
呢個從北方吹嚟嘅「神風」，就係中央政府完全放寬散戶來港交所投資，即「炒股自由行」。相信好多人都講，同分析買乜好，我當然都有推介。首先，大家要記得呢次係大陸散戶來港，佢哋買一隻股嘅理由可能好奇怪，原因可能炒股年資少或者訊息被封殺，今日就試吓roleplay。
滙豐唔係必掃貨
講受歡迎先。輪，應該好，因無風險不歡，輪商發達。長實、和黃，因李嘉誠。中石油、中移動，因大陸冇得買。
再講唔受歡迎嘅股票。滙豐，冇辦法，年資更淺，訊息更少嘅大陸散戶，都一定聽過「次按」呢兩個字。孫柏文死撐？Yes，unfortunately。
最後，我最希望見到啲特區投資銀行，快快手搞個實貨白銀ETF喺港交所上市。如果你哋唔搞，白銀戰隊搞！
金手指網誌： http://phatdat.blogspot.com