「就算她，跟你有段情，我也為你高興，用第三者身份見證……」年前盧巧音嘅《三角志》唱到街知巷聞，假如熱刺領隊祖爾識廣東話，可能佢知道自己踩入咗前鋒貝碧托夫同主席利維嘅三角關係，等於玩火自焚嘅話，𠵱家會顧影自憐，靜靜雞對「鹿」彈起琴來！
賣貝碧托夫得罪主席
熱刺夏天盡開「水龍頭」擴軍，偏偏開「咧」兩連敗，幸而上仗大數打比郡4球，理論上，連球迷會都公開力撐嘅祖爾，只係冇咗6分，斷估唔會成為英超第一個聞到魷魚香嘅教頭；但佢唔覺意入咗「死亡三角」，更點着火藥引！事緣聯賽首場鬥新特蘭，貝碧托夫對被換走顯出極度不滿，並惹起講求紀律嘅祖爾反感而向主席提出，不服從嘅球員該盡快放走。
碰巧曼聯近期求「鋒」心切，向熱刺開價2,000萬鎊，祖爾興奮到不得了；可惜，主席利維冇畀面祖爾，公開表示貝碧托夫乃非賣品，婉拒紅魔出手，間接突顯了後者嘅地位喺主席心目中遠高於祖爾；而佢「第一個」被炒賠率，喺多間外國賭波公司約為1.5倍，反超季前大熱保頓嘅李森美同打比郡嘅比利戴維斯。空穴來風，西維爾主帥拉莫斯、其經理人同利維等高層上周五喺西班牙密會，好彩俾行家影到相為證，即使事後佢經理人話係私人派對，其接棒傳言仍甚囂塵上。
傳西維爾統帥接手
老老實實，西維爾近年戰績卻力迫皇馬、巴塞，惟球隊年年將值錢主將賣走，拉莫斯亦意識到再咁落去唔係路；更撲朔迷離係，球隊今夏喺轉會交投異常冷清，拉莫斯好似冇心機玩落去，加上佢啱啱幫球會砌低皇馬，如要急流勇退，正係千載難逢嘅時機。嗱，你若然喺熱刺撼曼聯時見唔到祖爾，咪怪求大俠冇提你！