噚日恒指裂口高開754點之後，一日內狂升1200點，好多股評人出嚟解畫，話係中美聯手發功嘅成果。不過，華華覺得仲有一個可能性──就係觀世音救市。
華華唔係導人迷信，呢個係冠軍科技（092）主席簡文樂講嘅，佢噚日同華華講：「我擺啲觀音像喺港交所呢度，個市就升咗成千點嘞。」
呢批觀世音菩薩尊像同其他珍藏品共108件，全部係篤信佛教嘅簡文樂私人珍藏，會擺喺交易廣場展覽7日，作為慶祝冠軍科技成立20周年兼上市15周年，加埋子公司看通集團（1059）上市10周年。一次過慶祝3個生日，咁大日子，梗要搞大佢。咁啱噚日珍品展覽第一日，股市就刷新歷史紀錄，一日內升過千點，難怪簡文樂喺珍藏展開幕酒會上牙擦擦。
簡文樂仲話，擺108件珍品有寓意，「108」喺佛教代表108種唔同嘅煩惱，好似佛教嘅念珠，都係每串108粒；觀音就代表祥和同犧牲……咁用嚟形容過去兩個交易日嘅股市都好啱，上個禮拜五犧牲咗唔少股民，呢108件觀世音菩薩珍品似乎真係打救咗香港股民，免咗佢哋嘅煩惱。
至於呢批珍品價值有幾多，真係好難估計，但華華就知喺簡文樂屋企嘅數萬件藏品中，拎得出嚟嘅呢108件唔嘢小。不過簡文樂隆而重之搵咗虔誠嘅天主教徒煲呔曾嚟欣賞，但曾特首真係走咗個圈欣賞吓就走，不留一言隻字。
[email protected]