星展為咗推廣佢哋張DBSBlackCard，早排以矜貴嘅黑色法拉利作為抽獎禮品，呢架名車由訂做到落地，足足用咗年半時間，無形中，造就咗星展呢個幾乎全港最長嘅信用卡推廣期。
架黑色法拉利之前喺颱風「帕布」襲港嘅時候嚟到香港，為免日曬雨淋，暫時只會留喺代理車行裏面，星展零售銀行總監張耀堂專程第一時間親身去驗下架車。
原來呢架車同款喺香港得130部，新車落地車價要280萬，兩年二手價幾乎同新車價一樣。星展都預咗抽中嘅客可能會即時轉手，套現離場，不過，其實唔使咁心急嘅，二手車市場同港股唔同，應該唔會短時間內波動咁大，既然新車價同二手車差唔遠，人一世物一世，若果華華抽中，一定會鍊番轉先肯放。