股市狂跌，不少對冲基金唔掂，一啲銀行平時投資債券，以為好穩陣，點知人人有貪念，貪高息，德國、法國、日本都有商業銀行買咗有按揭抵押債券（Mortgage-backedsecurities），涉及次按債券，於是各國銀行紛紛公布有關損失，日日有一單，令投資者驚惶失惜。
追源禍始，皆因美國啲財務工程師太叻，諗出咁多絕橋，出咁多衍生工具，令全世界頭都暈晒。有人話，德國盛產工程師，但德國人只識計死板數，唔似美國啲財務工程師咁鬼精靈，識得空手入白刃。好嘞，投資市場玩得過份，對冲基金爭相踐踏，發生死傷，於是有好多人出晒聲，要求聯儲局立即減息、救市，否則伯南克就係表現不及格。
會唔會減息呢？美國聖路易聯邦儲備銀行WilliamPoole就話冇咁嘅事，除非有災難（calamity）發生，想講減息，要到九月十八日開會至講。反對減息救市嘅人仲有英倫銀行行長MervynKing，因為佢係BankofEngland嘅阿頭，姓氏係King，於是記者叫佢做KingofEngland，呢個雙關語（pun）用得幾趣致。英倫銀行之皇話：「蠢銀行做咗蠢事，自吃苦果，唔應該以為利率政策係佢哋嘅水泡。」講得非常明確。歐洲央行，聯儲局等等向市場注資成萬幾億港紙，英倫銀行就懶得開水喉。
呢位行長咁講原則，世間少見，可能係冇乜政治壓力之故。英國啲議員，冇美國議員咁惡死，唔會亂咁鬧英倫銀行。現任首相白高敦曾任財相十年，對經濟金融政策知得一清二楚，唔會好似布殊、安倍晉三咁矇查查，更何況白高敦係愛丁堡大學博士，英國報紙話白高敦學識廣博，久唔久就同一啲名教授對談，唔會居於下風。有白高敦與MervynKing在，倫敦超越紐約成為世界第一金融中心，世人唔會覺得意外。
寫寫吓，忽聞聯儲局削減貼現率（discountrate）半厘，但冇削減FedFundsrate。雖然唔算真正減息，顯然反映到伯南克備受壓力，唔學得MervynKing企得咁硬。