皇家馬德里自從新帥蘇斯達領軍，佢好似揸住張「有求必應」揮春咁四圍走，我求大俠想講嘅唔係佢哋嘅入球能力，而係邊個對手望住皇馬個大門，都輕易射得入！佢哋啱啱就喺西超盃次回合，主場輸3:5畀西維爾，睇咗咁耐波，有幾可見到皇馬防線失5球？蘇斯達，你點搞㗎？
遭西維爾攻入5球
早排我求大俠先聽到蘇斯達話喺季前友賽用咗28個人輪流上陣，目的係想試心水陣容，但呢位新教頭講到明默契仲係差啲，淨係試到個「最佳中堅組合」，佢話最對辦嘅暫時係簡拿華路＋比比喎。嘩！比比前晚錯漏百出，輸12碼又關佢事，最後又兩黃一紅被逐，點值1,900萬鎊（約2.9億港元）呀？成績咁差，賽後連隊長魯爾都叫球迷畀啲時間佢哋尋求進步。
丹尼爾臨別傑作？
嗰邊西維爾就勁得多，簡路廸大演帽子戲法之外，連拿度又梅開二度，最後贏5:3開咗個300倍「客其他」波膽，幾誇張呀！結果兩回合合計，西維爾以6:3捧走今季首個錦標。值得一提係，就快離隊嘅丹尼爾呢場波真係正選上陣，可能幫埋球隊捧盃先走人。皇馬都有個安慰獎嘅，新兵德倫特今場都射入1粒，攞到加盟球隊首個入球。
唉，皇馬前面入到波有乜用，防線失多幾倍嗰度弊呢！睇番佢哋季前熱身賽表現，連漢諾威、莫斯科火車頭同卡廸斯之流都可以射破其大門，蘇斯達仲唔搞搞個防線，唔使旨意衞冕囉。