噚日副刊介紹過九龍灣新高檔超市MarketPlacebyJasons有咩靚貨賣,今日我哋就請來為食識食兼兩屆新城電台「食神爭霸戰」評判的時裝設計師鄧達智(William),到Jasons買新款食材即煮,睇睇呢度嘅食材可以有咩發揮,又好唔好食,去片!
記者:廖秀娟 攝影:楊錦文
烹飪場地提供:TowngasAvenue(23672710)
大力推介 環球番茄
番茄種類好多,超過20款!荷蘭、澳洲、比利時……都有。紅色荷蘭番茄紅卜卜又飽滿;綠色的比利時番茄肉質豐滿而口感實在,唔會過腍又唔硬實,似食生果多啲,但仍有鮮甜番茄味,難怪要賣到$90/千克,成個沙律高級晒!
七彩加多加多
0hr20min
份量:4人
加多加多是最傳統的印尼沙律,用上本地有機通菜、新西蘭芽菜,更加新鮮,用腰果碎代替花生碎,更加香口。
材料
本地有機通菜200克、新西蘭芽菜40克、紅薯150克、蛋1隻、番茄1個、花生沙嗲醬3大茶匙、椰漿50毫升、青檸1/2個、腰果碎少許
做法
1.通菜及芽菜烚熟浸冰水,通菜切段;紅薯及蛋烚熟切片;番茄去椗切4份,連青檸全部上碟排好。
2.沙嗲醬加入椰漿拌勻上碟,面鋪腰果碎即成。
貼士
通菜、芽菜烚熟即浸冰水,會翠綠而爽脆;芽菜烚好後加入青檸汁會即時去掉草青味。
鯖魚雜菜沙律
0hr15min
份量:4人
於英國留學時成日食鯖魚,因為平嘛!呢款沙律簡單、健康又易做,兩個醬係精髓,做得好,蔬果新鮮就得㗎!
材料
煙鯖魚1包(約3條)、白苦瓜/台灣黃金芒各1/3個、比利時番茄2個、荷蘭番茄2個、黃椒1個、以色列無花果3個、松子少許、中東Hommos醬3大湯匙、牛油果1個、原味乳酪75毫升、蛋黃醬1湯匙
做法
1.煙鯖魚拆包裝上碟;白苦瓜、黃金芒、黃椒切條;番茄、無花果1個切4份,上碟備用。
2.牛油果起肉壓成茸,加入蛋黃醬、原味乳酪拌勻,下碟放在鯖魚旁邊。
3.再伴上Hommos醬,與牛油果醬同樣鋪上松子,便可以蔬果條蘸食。
貼士
蔬果可任意選擇時令或心頭好,台灣白苦瓜、黃金芒、比利時番茄都係少見又時令之選,所以今次試用。
中蝦墨魚汁扁意粉
0hr30min
份量:4人
雖然Jasons以亞洲食材主打,西餐材料不算多,亦無海鮮檔,但William都可以做幾個西菜,有香料就可以幫到好多,呢個墨汁意粉就係其中之一。
材料
菠菜扁意粉500克、中蝦50克、奧勒岡6克、迷迭香6克、洋葱65克、蒜茸40克、墨魚連汁罐頭1罐
做法
1.意粉加入滾水煮12分鐘,撈起備用。
2.半份洋葱、半份蒜茸起鑊炒香中蝦備用;餘下洋葱及蒜茸再起鑊炒香意粉,加入奧勒岡、迷迭香及墨魚連汁再炒。
3.炒至墨魚汁均勻沾滿意粉,最後加入蝦同炒熱便成。
貼士
墨魚汁可用新鮮墨魚取汁,味道比罐頭香濃;4人份量意粉約要一斤墨魚取汁,當然過程較麻煩。
喇沙蒟蒻麵
0hr20min
份量:2人
本來係用喇沙米粉或普通米粉做,但今次試改用蒟蒻麵,效果好好,入味而又彈牙;頂湯皇亦好好用,湯即時鮮味香濃得多,慳番唔少料同熬湯時間。
材料
蒟蒻麵1包、靈芝菇30克、中蝦100克、番茄1個、椰漿75毫升、鮮奶500毫升、香茅50克、洋葱20克、蒜茸20克、南薑15克、辣椒仔2隻、咖喱醬7茶匙、大喜慶頂湯皇1茶匙
做法
1.蒟蒻麵淥至半熟,下靈芝菇一同煮熟備用。
2.洋葱及蒜茸起鑊炒香中蝦備用。再用洋葱及蒜茸起鑊,炒香番茄、南薑、香茅及辣椒仔,加入咖喱醬再炒,最後加入椰漿、鮮奶及頂湯皇同煮滾。
3.加入蝦與靈芝菇再煮滾即可。
貼士
頂湯皇要以1:20的水稀釋,想湯更濃滑,以鮮奶代替水效果更佳。
至愛食材推介
William行咗一圈就話:「呢度有好多日本同台灣貨,有啲東南亞香料、調味、蔬菜及生果都未見過;香港大喜慶頂湯皇、蒟蒻麵都唔知係乜。」個幾鐘後,William興奮地狂掃咗兩籃食材,「呢度啲本地有機菜好新鮮,菇類亦好多;只係西餐食材料唔算多,芝士及凍肉唔算齊全。」
大喜慶頂湯皇
去過銅鑼灣大喜慶食翅,都唔知出咗支裝頂湯。頂湯皇好濃味,用嚟做湯底會慳番好多工夫,但記住要稀釋。
泰國香料包
蔬菜凍櫃有一包包泰國香料包,有齊香茅、南薑、辣椒、青檸、魚露,一包夠做一個泰菜,唔使逐款執,好方便。
入口水種菜
從未見過有水種住賣的水種菜,每日台灣入口,一定新鮮啦!白菜$22/kg,一定比內地菜貴,但都值得試!
本地有機菜
我更鍾意本地有機菜,支持環保減少運輸廢氣,通菜$18/kg,唔算貴。我買嚟做加多加多,清甜有菜味!
身材矮小攞頂貨一樣掂
最適合亞洲人環境
除咗貨品以亞洲食材為主,貨架亦為亞洲人而設,五短身材的記者伸手都可攞到頂層貨品,近6呎高的William更無難度。
超靚無花果
William見到籃無花果即時愛不釋手,「我知南美洲的無花果最好食,估唔到呢度有得賣呢!」
職員幫手送貨
同其他大型超市一樣,Jasons都係買滿$400免費送貨;如未買夠數,可以請職員幫你推車仔到德福停車場或的士站,好幫到手㗎!
買定料 明日同你煮餸
無錫花竹蝦
花竹蝦1隻、鮮白菌2隻、西蘭花適量、指天椒1隻、茄汁1湯匙
要食爽口彈牙的花竹蝦,一定要揀生猛貨色,顏色深淺不重要,亦不會出現「水蝦」情況。
醬油小笋伴乳豬件
罐頭笋3至4両、冰糖2両、乳豬片/紅加侖子適量
魚滑米線
米線1碗、草菇2粒、菜心2條、鯪魚肉8両、雞湯500毫升
紅燒雞絲翅
即食翅2至3両、雞絲1両、上湯1碗