9歲入大學都好巴閉，點知噚日新雅文化事業出版社嘅Monica就email畀我，介紹我睇一本叫做《七歲進哈佛》嘅書。咁厲害，7歲入到大學？我真係要見識吓，於是即刻打個電話畀Monica。
Monica笑笑口話，唔係7歲入哈佛大學，而係要7歲開始培養子女入讀哈佛。佢話本書嘅作者係韓裔美國人李行哲夫婦，佢哋將自己親身嘅經驗寫出嚟，講點樣栽培兩個仔入讀哈佛大學，佢哋高中已經攞到美國中學生最高榮譽嘅總統獎，約18歲入讀哈佛。
Monica話，李行哲呢本教仔秘笈分開四個篇章，包括父母同子女共同成長嘅10個家庭教育法、全面發展子女潛能10項人才教育法、從小學到大學分階段嘅學習方案等。呢本書喺韓國嘅銷量更突破100萬本，啱啱喺香港有得賣，每本68蚊。計小妹話齋，花68蚊就可以培養子女讀哈佛，又幾抵喎。
逢周一至周四刊出