聯儲局使出絕招，亞太股市似火燒。人家開「水閘」，只為挽救銀行同業拆放流暢，並使金融市場回復正常，亞太股市卻以為鴻鵠將至，個個怕執輸行頭，買盤好似沒有明天般湧至。瞧瞧「同出一脈」的星、港股市升約6%，竟然升少過干卿底事的印尼（升7%），藕斷絲連的日本則只升3%，反而馬泰台澳等紛紛贈興，升3.8%至5.26%不等，是條氣唔順焗追火車，抑或真係明天更加好，甚或是另一場引君入甕的序幕？
這次「V形」走勢，誘發冠一擁躉紛上網表揚在下，實愧不敢當。若講自己好彩，則稍嫌過份謙虛，亦即變成虛偽；如果認屎認屁，又唔似「學者」本色，惟有說是經驗加運氣吧！
有朋友或會問：「冠一，你不是睇得（個市）好好的嗎？為甚麼又在潑冷水？」
本來覺得個市應該調整完畢，之後便穩步上揚，豈料升得如此急速，似乎反映投資者有點失去理性，反而令筆者有戒心。美股上升，乃有「任務」在身──一條腿「跛」咗，另一條腿若企唔穩，即提前宣佈「大選」，執政黨可以休矣！有心人不藉儲局出招力撐，更待何時？然則，亞太區股市又何須雀躍至如斯？難道以為美國經濟真係好到加零一，抑或認為企業盈利又再現奇迹，回復當年的雙位數字增長？
讓冠一講個「滾水淥豬腸」的故事給汝等聽。經過這次環球花式「插水」表演後，資金見過鬼怕黑，絕大部份追求卓越──流向聯邦債市，商業票據遂乏人問津。突然制水，企業慘況可思過半矣！企業付高息之餘，手上現金盡用，又何來sparecash回贖股份？汝道是否兩頭縮？
那麼，這股推動股市上升的動力一旦消失，便只有倚靠「肩負重任」之士撐了。至於亞洲，就靠晒你哋啦！！