8年情，未完！唔係講緊李小姐，要八卦請揭去娛樂版，今日係男人講車經。8年情主角係R34，三代日產GT-R長情十幾年，由R32開始錢嘉樂一直愛戰神。車沒變，性情卻大變，由19歲考牌後開始改車玩車，飛過炒過落場無數次，最後得到兩句：「改車為操控為安全，賽車係贏個Brake。」42歲大男人係時候長情穩陣兼靠得住，8年情，未完呀呵？
文：嘴嚼爺 攝影：陳偉強
落過Track唔再飛街
直認飛過車，回頭是岸嘅個案好老土，仲要將興趣變做職業，死𡃁仔飆車族聽到都話你儍。好彩，嘉樂唔會大講人生真理，好現實同你講錢，飛緊車嘅都要煞停聽兩句。
「飛車，後生嗰陣都有嘅。當年做龍虎武師搵到啲錢就買車玩啦。諗起都覺戇居，喺街度飛車唔要命兼唔要錢；炒車撞山，整車又要放低錢；撞到人哋架車，人冇事已經好，但揩花撞凹又係要錢整；再大鑊啲『滔』埋（TotalLost），直頭慘過放血！」
超速抄牌被罰、嘥錢整車，不如正正經經學賽車：「嗰陣阿哥（錢小豪）學賽車，我又攞幾萬蚊上去學，有合法地方感受速度感同發洩，自然唔會喺街飛，更加認為喺街飛好危險。所以我玩親《GT4》都輸畀林曉峰，因為我識驚囉，佢仲話有啲位挨牆入彎會快啲！真正鍊車係贏個Brake嘅，你要知幾時減速、減幾多，呢啲就係喺賽車場度先學到。」
幾萬蚊學賽車？拎去改條坼天喉好過啦！「我主張改車㗎，不過要改就改操控，等架車可以更安全。呢樣日本就好好喇，有晒官方嘅改裝公司，改都改得安全啲，唔似香港乜都禁，搞到人偷偷改、亂咁改，咁咪仲危險囉。」
愛戰神四方有性格
開車心態大變，但座駕卻仍然係日產戰神GT-R，由R32到R34。「下一代就算面目全非，我相信都一樣會買，感情嚟嘅。」難捨難離因為有堅持：「佢真係有一套，嗰陣三菱有FTO，Toyota有Supra，Honda有NSX，全都為外國而推出左軚版。惟獨日產GT-R勁有性格，冇出過左軚版，所以嗰時我都係得水貨GT-R咋。」
還記得，戰神之名源於賽道上打破歐洲車壟斷局面，「細個睇東望洋，永遠係歐洲車稱王。90年GT-R好似神話一樣，贏盡歐洲車，仲要快成個圈！」講起戰神威水史，嘉樂停唔到口，直情可以做GT-R代言人：「仲有佢又夠經典啦，四四方方大大架，四盞圓燈好有戰鬥格，我唔係太鍾意啲圓滑又流線嘅跑車。」
夢想拍旺角甩尾
嘉樂揸旗嘅錢家班已經幫過好多港產片做賽車甩尾特技，近作有電視播緊嘅《歲月風雲》，包辦甩尾打圈標煙場面，清水灣車神原來唔係吳卓羲，係嘉樂老友甩尾王海棠。
不過，講到賽車戲，嘉樂仲係記住《烈火戰車》。「到𠵱家都係最好嘅港產賽車片，因為拍得好真實，你會睇到車手邊度落Brake邊度轉波，而且角色描寫好深入，好似我咁，喺戲入面就係因為成日擰轉頭望後面，所以輸。」
講番現代，嘉樂話計劃拍番套齋講賽車嘅戲，最想最想，係喺鬧市拍飛車場面：「啲人可能仲係對賽車有偏見，人哋拍戲可以封街，但拍賽車就唔得。拍賽車冇得偷雞拍㗎嘛，一定要申請，我哋𠵱家都爭取緊，最想可以喺旺角呢啲鬧市拍到飛車場面，一定好震撼。唔好成日淨係俾我哋喺將軍澳工業區拍啦！」
飄移旺角？好呀，旺角啲路同逼狹停車場，真係窄到要甩住尾入㗎！
錢家班預告
「我唔夠海棠手車嚟，落場砌贏佢嗰次都係佢讓我啫！」預告，手車好過嘉樂嘅海棠同一班甩尾王，加埋佢哋激改嘅甩尾戰車，將會出現在《同車蜜語》，密切留意！
