正所謂男女有別，男人同女人喺公司發脾氣，會有唔同效果。美國耶魯大學調查發現，男職員如果發嬲，可能會受到其他同事尊敬，但如果係女職員，就會被視為情緒「失控」同工作能力不足。
有網友喺《MSNBC討論區》問：「你哋喺公司有冇見過呢種『雙重標準』嘅情況？」
女人當情緒失控
FreeCitizen話：「我公司有幾個男同事，唔係好做得嘢，每當工作遇到阻滯就發脾氣。佢哋工作能力咁差，居然走去女上司嘅辦公室拍枱拍凳，要求升職，結果又真係升咗。我係一個女職員，有次向上司稍為發脾氣，投訴工作壓力大，不過佢冇理我。」
HitchHiker講：「喺不同工作環境發嬲，會有唔同效果，例如喺律師行，嗰度啲人經常講粗口同發脾氣，所以發嬲可以接受；但如果喺一間電腦公司，就會令人覺得你唔夠專業。」
NPGMBR話：「我最憎啲人喺我面前發脾氣，就算係公司總裁向我無理取鬧，我亦會唔開心，會考慮劈炮唔撈。」krutch反駁：「有啲員工受硬唔受軟，上司有時係需要向佢哋發嬲，提高工作士氣；但切記要控制情緒，唔好講埋啲人身攻擊嘅說話，否則會有反效果。」
耶魯大學學者布瑞斯柯爾話：「喺公司發脾氣或者可以提升地位，但女性最好冷靜啲，因為睇起上嚟會比較理性。」美國總統候選人希拉莉，就曾經被批評為「太容易發嬲而唔適合做總統」。